Elde merzimi ótken atqarýshylyq óndirister boıynsha tyıymdar men shekteýler avtomatty túrde alynady
ASTANA. KAZINFORM — Memleket basshysy «Atqarýshylyq is júrgizýdi jetildirý máseleleri boıynsha keıbir zańnamalyq aktilerge ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.
Qujat atqarýshylyq is júrgizý júıesiniń tıimdiligin arttyrýǵa, azamattar men zańdy tulǵalardyń quqyqtary men zańdy múddelerin qorǵaýdy kúsheıtýge, memlekettik baqylaý tetikterin jetildirýge jáne sot oryndaýshylarynyń jaýapkershiligin arttyrýǵa baǵyttalǵan.
Zańda atqarýshylyq qujattardyń ýaqytyly ári ádil oryndalýyn qamtamasyz etýge, ákimshilik kedergilerdi azaıtýǵa jáne májbúrlep oryndatý rásimderiniń ashyqtyǵyn arttyrýǵa arnalǵan birqatar sharalar qarastyrylǵan.
Atap aıtqanda, usyný merzimi ótip ketken atqarýshylyq qujattar boıynsha qoldanylǵan barlyq májbúrlep oryndatý sharalaryn avtomatty túrde alyp tastaý tetigi engiziledi.
Sonymen qatar jeńildetilgen atqarýshylyq is júrgizý qoldanylatyn jaǵdaılardyń aýqymy keńeıtiledi. Onyń shekti mólsheri 20 aılyq eseptik kórsetkishten 40 aılyq eseptik kórsetkishke deıin ulǵaıtylady.
Qujatta qoldanystaǵy jeke sot oryndaýshylarynyń kásibı quzyrettiligin baǵalaý maqsatynda olardy attestattaýdan ótkizý de kózdelgen.
Túzetýlerge sáıkes, ýákiletti organ zańnamada belgilengen jaǵdaılarda jeke sot oryndaýshylaryn lıtsenzııasynan aıyrý quqyǵyna ıe bolady. Al aýmaqtyq ádilet organdary baqylaý is-sharalarynyń qorytyndysy boıynsha tıisti usynystar engize alady.
Zańdaǵy taǵy bir jańashyldyq — sot oryndaýshylarynyń áreketteri men sheshimderine shaǵymdanýdyń mindetti sotqa deıingi tártibin engizý.
Zańdy iske asyrý atqarýshylyq is júrgizýge qatysýshylardyń quqyqtaryn qorǵaý deńgeıin arttyrýǵa, sot oryndaýshylary qyzmetindegi zańdylyq pen tártipti nyǵaıtýǵa, sondaı-aq elimizdegi májbúrlep oryndatý júıesiniń tıimdiligin joǵarylatýǵa múmkindik beredi.
Buǵan deıin Qazaqstanda jeke sot oryndaýshylaryna boryshkerlerdi turǵyn úıden shyǵarý týraly keminde 10 kún buryn habarlaý mindeti engiziletinin jazǵanbyz.
