Elde memlekettik satyp alýdy ótkizý merzimi birneshe ese qysqartyldy
ASTANA. KAZINFORM – Konkýrs tásilimen ótkiziletin satyp alý boıynsha tıisti qujattamany talqylaý 5 kúnnen 2 jumys kúnine deıin, ótinimderdi qabyldaý — 15 kúnnen 5 jumys kúnine deıin, ótinimderdi qaraý jáne qorytyndylaý — 10 kúnnen 3 jumys kúnine deıin qysqartyldy.
Qazaqstanda 2025 jylǵy 1 qańtardan bastap kúshine engen jańa jeńildetilgen erejeler boıynsha memlekettik satyp alý týraly alǵashqy sharttar jasaldy. Olardy qabyldaý jobalardy, sonyń ishinde áleýmettik mańyzy bar jobalardy jedel iske qosýǵa jáne olardyń qymbattaýyndaǵy táýekelderdi azaıtýǵa múmkindik beredi. Jeńimpazdar negizinen jergilikti kompanııalar bolady, bul aımaqtardyń bıznesi men ekonomıkasyna qoldaý bolyp sanalady.
Memleket basshysy 2024 jylǵy 1 shildede rásimderdi ońaılatýǵa jáne bıýrokratııadan aryltýǵa baǵyttalǵan «Memlekettik satyp alý týraly» jańa zańǵa qol qoıdy. Zań sheńberinde memlekettik satyp alýdy ótkizý merzimderin barynsha qysqartýdy qamtıtyn jańa Erejeler qabyldandy.
Máselen, konkýrs tásilimen ótkiziletin satyp alý boıynsha tıisti qujattamany talqylaý 5 kúnnen 2 jumys kúnine deıin, ótinimderdi qabyldaý — 15 kúnnen 5 jumys kúnine deıin, ótinimderdi qaraý jáne qorytyndylaý — 10 kúnnen 3 jumys kúnine deıin qysqartyldy. Osylaısha, konkýrstar men aýktsıondar boıynsha jeńimpaz eń kóp degende 10 jumys kúni ishinde anyqtalady.
Reıtıngtik-baldyq júıeni qoldana otyryp ótkiziletin konkýrs (satyp alýdyń avtomattandyrylǵan tásilin, jeńimpazdy veb-portal aıqyndaıdy) arqyly satyp alý jeńimpazdary jınalǵan baldar negizinde 5 jumys kúni ishinde (buryn merzimi 29 jumys kúnin quraǵan) aıqyndalady. Olar jumys tájirıbesi, turaqty salyq aýdarymdarynyń bolýy, keshiktirýlerdiń bolmaýy jáne basqalary úshin beriledi.
Baǵa usynystaryn suratý tásilimen satyp alý merzimi 5 kúnnen 2 kúnge deıin qysqartyldy.
Sondaı-aq jergilikti jetkizýshiler úshin shartty jeńildikter 1%-dan 2%-ǵa deıin ulǵaıtyldy.
Aqmola oblysynyń Zerendi aýylynda balalar men jasóspirimder sport mektebiniń qurylysy boıynsha baıqaý jańa erejeler boıynsha elimizde alǵashqylardyń biri bolyp ótkizildi. Ol bıylǵy 8 qańtarda jarııalandy, al onyń qorytyndysy 6 jumys kúni ishinde shyǵaryldy jáne 16 qańtarda qurylys salýshy jumysqa kiristi.
- Jobanyń quny 2 mlrd teńgeden asady. Merdiger reıtıngtik-baldyq júıeni qoldana otyryp, jańa memlekettik satyp alýlar boıynsha tańdaldy, bul konkýrs merzimin aıtarlyqtaı qysqartty. Bul bizge qurylysty 16 qańtarda bastap ketýge múmkindik berdi. Joba jyl sońyna deıin aıaqtalady jáne nysan paıdalanýǵa beriledi. Sondaı-aq biz júıede qosymsha ball alatyn jergilikti qurylys salýshylarǵa nazar aýdaramyz, bul olardyń qatysýyn yntalandyrady, - dedi Aqmola oblysynyń qurylys, sáýlet jáne qala qurylysy basqarmasy basshysynyń mindetin atqarýshy Azamat Baıqýanyshev.
Sport mektebiniń ǵımaraty ótpe jol arqyly bir-birimen baılanysqan eki bloktan turady. Munda trenajer zaly, hokkeı korty jáne basqa da jattyǵý alańdary jumys isteıtin bolady. Qurylys materıaldarynyń 90%-yn jergilikti óndiristen alý josparlanyp otyr. Aýyldyq sport mektebiniń jalpy qabyldaý múmkindigi – aýysymda 78 adam.
Jańa erejeler boıynsha 330 adam turatyn Batys Qazaqstan oblysynyń Jalyn aýylynda sý qubyryn salý boıynsha konkýrs ótkizildi. Jeńildetilgen júıeniń arqasynda satyp alý protsedýrasy alty kúnde júrgizildi, bul jergilikti qurylys salýshyǵa jumysqa tez kirisýge múmkindik berdi. Jobanyń quny – 785 mln teńgeden astam. Sý qubyrynyń qurylysy aýyl turǵyndaryn sapaly aýyz sýmen qamtamasyz etedi.
Sonymen qatar Túrkistan oblysy Saryaǵash qalasynda jańa býyndy damytý ortalyǵynyń qurylysy bastaldy. Jobanyń quny – 2,7 mlrd teńgeden astam. Merdiger 8 jumys kúni ishinde reıtıngtik-baldyq júıeni qoldana otyryp tańdalǵan jergilikti kompanııalardyń biri boldy.
Shymkent qalasynyń Bozaryq shaǵyn aýdanynda kópqabatty turǵyn úıler salý jobasy boıynsha satyp alý rásimi 7 jumys kúni ishinde júrgizildi. Jobanyń quny – 4,9 mlrd teńgeden astam.
Ulytaý oblysynyń Myńadyr stansasynda mektep salý boıynsha satyp alý rásimi 5 jumys kúni ishinde júrgizildi, merdiger jergilikti kompanııa boldy. Jańa mektep salý oqýshy oryndarynyń tapshylyǵy máselesin sheshedi. Qazirgi ýaqytta jumys istep turǵan mektep tolyp ketken, sport zaly da joq. 80 orynǵa eseptelgen jańa eki qabatty mekteptiń kabınetteri sapaly bilim berý úderisin qamtamasyz etý úshin zamanaýı jabdyqtarmen jabdyqtalady.
Jańa erejelerge sáıkes, osy jyldyń 10 aqpanyndaǵy jaǵdaı boıynsha Qazaqstanda 951,38 mlrd teńge somasyna 282 703 shart jasaldy. Salystyrý úshin: ótken jyldyń tıisti kezeńinde 223,2 mlrd teńgege 165 558 shart jasalǵan.
Berilgen shaǵymdardyń sany ótken jylmen salystyrǵanda 22%-dan astamǵa: 1700-den 1320-ǵa deıin tómendedi.