Elde mektep dırektorlarynyń tapshylyǵy úsh esege qysqardy
ASTANA. KAZINFORM — 2023 jyldan beri elimizde «Bilim berýdegi ózgeristerdiń 1000 kóshbasshysy» strategııalyq jobasy iske asyrylyp jatyr. Memleket basshysynyń tapsyrmasy boıynsha júzege asyp jatqan joba basqarýshylardyń jańa býynyn qalyptastyrýǵa baǵyttalǵan.
Oqý-aǵartý mınıstrliginiń málimetinshe, Prezıdenttik jastar kadr rezerviniń úlgisinde jasalǵan joba nátıjesinde 2023-2024 jyldary 583 pedagog rezervıst atandy.
Onyń 400-den astamy basshylyq qyzmetke konkýrssyz taǵaıyndalsa, 40 dırektor búginde «Keleshek mektepteri» Ulttyq jobasy aıasynda ashylǵan mektepterdi basqaryp otyr. Osylaısha, Qazaqstandaǵy mektep dırektorlarynyń tapshylyǵy úsh esege qysqardy.
— Joba jalǵasyn taýyp 2025 jyly taǵy 428 úmitker oqýdan ótti. NZM Pedagogıkalyq sheberlik ortalyǵynda mektep dırektorlarynyń orynbasarlaryn oqytý 21 shildede bastalyp 12 qyrkúıekte aıaqtaldy. Bilim berýdegi ózgeris kóshbasshylary birneshe kezeń boıy iriktelip, úsh deńgeıde biliktiligin arttyrǵan soń qorytyndy baǵalaýǵa jiberilgen bolatyn, — delingen habarlamada.
Baǵdarlama qatysýshylary 15-26 qyrkúıek aralyǵynda ótken qorytyndy baǵalaýdan ótý úshin refleksıvti esep ázirledi. Onda úmitkerler alǵan bilimderin tájirıbede qoldana biletinin dáleldeýi qajet. Atalǵan materıaldar belgilengen krıterıılerge sáıkes tekserilip, «Nazarbaev Zııatkerlik mektepteri» DBBU Pedagogıkalyq ólsheýler ortalyǵynyń syrtqy saraptamasyna joldandy. Bul kezeńnen sátti ótken mamandar kadrlyq rezervke qosylý úshin Oqý-aǵartý mınıstrligi janyndaǵy komıssııamen áńgimelesýge joldama aldy.
Esterińizge sala keteıik, «Bilim berýdegi ózgeristerdiń 1000 kóshbasshysy» jobasyn sátti aıaqtaǵan jáne kadr rezervine kirgen mamandar konkýrstyq rásimderden ótpeı-aq birinshi basshynyń bos ornyna taǵaıyndalady.
Aıta ketelik Prezıdent oqýshylardyń tsıfrlyq profılderin jasaýdy tapsyrǵan edi.