Elde medıtsınalyq bilim berý 7 jyldyq oqýǵa kóshirilmek
ASTANA. KAZINFORM — Medıtsınalyq oqý baǵdarlamasynyń mazmuny qıyndaıdy. Bul týraly Májilistiń jalpy otyrysynda bilim berý máseleleri boıynsha ózgeris engizýdi talqylaý kezinde depýtat Ashat Aımaǵambetov málim etti.
— Medıtsınalyq bilim berýde júıeli máseleni sheshemiz. Maqsatymyz — osy saladaǵy bilim berý sapasyn kóterý. Qazir medıtsınalyq JOO-larda stýdentter úsh túrli júıe boıynsha oqyp jatyr. Sońǵy reforma boıynsha stýdent 6 jyl oqıdy. Onyń ishinde: bakalavrıat — 5 jyl, magıstratýra — jarty jyl, ınternatýra — jarty jyl. Internatýradaǵy osy jarty jyldy stýdent aýrýhanada naqty bir mártebesiz, medıtsınalyq júıelerge ruqsatsyz, qarapaıym em-domǵa qatysý quqyǵynsyz ótkizedi, ıaǵnı óz betimen júredi. Osyndaı 6 jyldyq oqýdan keıin olar jumysqa da tura almaıdy, óıtkeni barlyǵy mindetti túrde rezıdentýradan ótýi kerek, oǵan taǵy 2-4 jyl qajet, — dedi Ashat Aımaǵambetov.
Onyń aıtýynsha, rezıdentýraǵa grant sany óte az. Kóp jaǵdaıda aqyly negizde bilim alady. Tıisti ózgerister engizilmese, aldaǵy ýaqytta kadr tapshylyǵy bolýy múmkin.
— Endi, 7 jyldyq oqýǵa kóshemiz. 6 jyl ýnıversıtettegi teorııalyq oqý jáne 1 jyl aýrýhanada ótetin tolyqqandy praktıkalyq ınternatýra bolady. Osydan keıin olar alǵashqy býyndaǵy jalpy praktıka dárigeri retinde jumys isteı alady. Biraq nevropatolog, neırohırýrg sııaqty baǵyttarda maman bolǵysy kelse, qazirgideı rezıdentýra oqýyn jalǵastyrýy tıis. Sonymen qatar, oqý baǵdarlamasynyń mazmuny da qarqyndy bolady. Anatomııa, fızıologııa sekildi irgeli klınıkalyq pánder tıptik baǵdarlamada qatań bekitiledi. Ár medıtsınalyq ýnıversıtet muny tolyq kólemde berýge mindetti bolady. Al osy bazalyq deńgeıdi meńgergennen keıin, táýelsiz alańda mindetti emtıhan tapsyrady. Internatýra ımıtatsııa emes, shynaıy bolady, — dedi depýtat.
Osy oraıda altynshy kýrs túlegi dáriger-ıntern resmı mártebesin alady. Bul óz kezeginde aqparattyq júıelerge ruqsat beriletinin bildiredi. Tálimger dárigerdiń baqylaýymen jas maman bazalyq medıtsınalyq áreketterin jasaý quqyǵyn alady. Bul rette, eńbekaqy alýǵa, qorǵanys quraldarymen qamtamasyz etýge múmkindik beriledi.
— Bolashaq dárigerlerge sapaly ári naqty tájirıbe beriledi. Sondaı-aq Densaýlyq saqtaý mınıstrligi medıtsınalyq joǵary oqý oryndaryna qabyldaýdy, sheteldik stýdentter men aqyly bólimderdi retteý boıynsha naqty mehanızmge ıe bolady, — dedi Ashat Aımaǵambetov.
Budan buryn habarlanǵandaı, elde pedagogıkalyq mamandyqtar boıynsha oqýǵa túsý talaby kúsheıedi.