Elde maıly daqyldarǵa suranys artty

Bul kórsetkish ótken jylmen salystyrǵanda 11,6 mlrd teńgege artyq. Ulttyq astyq operatory kóktemgi egis jumystaryn qarjylandyrýǵa byltyrǵy jyldyń jeltoqsan aıynda ótinim qabyldap bastaǵan. Bul sharýalarǵa jaýapty naýqanǵa aldyn ala daıyndalýǵa múmkindik berdi.

Bıylǵy jylǵy 15 mamyrdaǵy jaǵdaı boıynsha kúzgi jetkizilimge 478 myń tonna dándi jáne maıly daqyldardy tapsyrý jóninde kelisimsharttar jasalǵan. Onyń ishinde negizgi úles bıdaıǵa tıesili, ıaǵnı, 334,3 myń tonna.

Sonymen qatar agroqurylymdar ónim jınalǵannan keıin korporatsııa qoryna 95 myń tonna kúnbaǵys, raps jáne zyǵyr tuqymyn ótkizýdi josparlap otyr. Bul ótken aýyl sharýashylyǵy maýsymymen salystyrǵanda 2,5 ese joǵary.

Basqarma tóraǵasy Asylhan Djývashevtiń aıtýynsha, maıly daqyldarǵa qyzyǵýshylyqtyń artýy olardyń joǵary naryqtyq qunymen jáne ishki-syrtqy naryqtaǵy turaqty suranysymen baılanysty. Sonymen qatar jańa qaıta óńdeý qýattarynyń iske qosylýy shıkizatqa degen qajettilikti arttyryp otyr.

Onyń aıtýynsha, memlekettik qoldaý sharalary da mańyzdy ról atqarady. Atap aıtqanda, egis alqaptaryn ártaraptandyrý jáne bir daqylǵa táýeldilikti azaıtý baǵytyndaǵy saıasat aıasynda maıly daqyl óndirýshilerdi forvardtyq qarjylandyrý shekteri keńeıtilgen. Sonyń nátıjesinde fermerler jańa maýsymda kúnbaǵys jáne ózge de maıly daqyldardy jetkizýge eki ese kóp ótinim bergen. Bul aýyl sharýashylyǵy qurylymdarynyń bıdaıdan naryqqa baǵdarlanǵan daqyldarǵa birtindep kóshýin kórsetedi.

Forvardtyq qarjylandyrý shaǵyn jáne orta sharýashylyqtardy qoldaýdyń tıimdi tetikteriniń biri sanalady. Ol fermerlerge egis jumystaryna, tehnıka jóndeýge jáne qajetti resýrstardy satyp alýǵa aınalym qarajatyn ýaqytyly tartýǵa jol ashady, sondaı-aq bolashaqta ónim ótkizý kepildigin qamtamasyz etetin naryq qalyptastyrady. 

Aıta ketelik byltyr bankter aýyl sharýashylyǵyna 207 mlrd teńge nesıe bergen.