Elde maılaý materıaldary men tehnıkalyq suıyqtyqtardy mindetti tańbalaý bastaldy
ASTANA. KAZINFORM — 2026 jylǵy 1 qyrkúıekten bastap Qazaqstanda avtomobılderge arnalǵan maılaý materıaldary, antıfrızder jáne arnaıy suıyqtyqtardy mindetti tańbalaý talaptary kúshine endi.
Biryńǵaı taýarlardy tańbalaý jáne qadaǵalaý operatorynyń málimetinshe, tańbalaýǵa jatatyn ónimderdiń tizimi keńeıtildi. Endi 2026 jylǵy 1 qyrkúıekten keıin óndirilip, Qazaqstan aýmaǵynda satylatyn tıisti taýarlardyń barlyǵynda tańbalaý kody bolýy kerek.
Bul talap otandyq naryqty kontrafaktilik jáne jalǵan ónimderden qorǵaýǵa, adal kásipkerlerdi qoldaýǵa, taýarlardyń ımporty men satylýyn baqylaýdy kúsheıtýge jáne tutynýshylardyń qaýipsizdigin qamtamasyz etýge baǵyttalǵan.
Maılaý materıaldaryn mindetti tańbalaý Qazaqstanda kezeń-kezeńimen engizilip jatyr. Birinshi kezeń 2026 jylǵy 1 aqpanda bastaldy. Osy kúnnen bastap óndirilgen motor maılary tańbalanýǵa tıis.
Ekinshi kezeń 2026 jylǵy 1 qyrkúıekten bastalyp, SEQ TN-niń 27, 34 jáne 38-toptaryna jatatyn maılaý materıaldarynyń, antıfrızder men arnaıy suıyqtyqtardyń keńeıtilgen tizimin qamtıdy.
Al 2027 jylǵy 1 aqpannan bastap osy sanattaǵy 2027 jylǵy 1 aqpannan keıin óndirilgen taýarlardyń búkil jetkizý tizbegi boıynsha tolyq qadaǵalanýy engiziledi. Bul ónimniń óndirýshi nemese ımporttaýshydan bastap bólshek saýdada satylǵanǵa deıingi qozǵalysyn baqylaýǵa múmkindik beredi.
Maılaý materıaldary men arnaıy avtomobıl suıyqtyqtaryn satatyn barlyq aınalym qatysýshylary, sonyń ishinde bólshek saýda dúkenderi, janarmaı quıý stantsııalary men dılerlik ortalyqtar Taýarlardy tańbalaý jáne qadaǵalaýdyń tsıfrlyq júıesinde tirkelýi qajet.
Tirkeý Biryńǵaı operatordyń júıesi arqyly júrgiziledi.
Osyǵan deıin 1 qyrkúıekten bastap bıologııalyq belsendi qospalardy mindetti tsıfrlyq tańbalaý engiziletinin jazǵan edik.
