Elde maýsymdyq sý tutynýdyń jańa modeli qalyptasyp jatyr
ASTANA. KAZINFORM — Kúrish alqaby 20,2 myń gektarǵa, atap aıtqanda, Qyzylorda oblysynda — 10,9 myń ga, Túrkistan oblysynda — 7,4 myń ga, Almaty oblysynda — 1,9 myń gaktarǵa qysqardy.
Memleket basshysynyń egis alqaptaryn ártaraptandyrý jónindegi tapsyrmasy aıasynda kúrish pen maqta sııaqty sý syıymdylyǵy joǵary daqyldardyń úlesin qysqartýǵa erekshe nazar aýdarylyp otyr. Bul shara sý júktemesin tómendetýge jáne qolda bar resýrstardy utymdy paıdalanýǵa baǵyttalǵan. Atalǵan tásilder 2024–2028 jyldarǵa arnalǵan aýyl sharýashylyǵynyń jalpy ónim kólemin eki esege arttyrý jónindegi Jol kartasynda kórinis tapqan.
Osy rette jeltoqsan aıynyń basynda Qyzylorda, Túrkistan jáne Jambyl oblystaryndaǵy egis qurylymyn ońtaılandyrý máseleleri qaralyp, onda sý az qajet etetin daqyldarǵa kóshýge jáne sý únemdeý tehnologııalaryn, onyń ishinde tamshylatyp sýarýdy keńinen engizýge aıryqsha nazar aýdaryldy.
Jumysty júıeli úılestirý maqsatynda quramyna ortalyq jáne jergilikti atqarýshy organdardyń, salalyq kásiporyndar men ǵylymı qaýymdastyq ókilderi kirgen vedomstvoaralyq jumys toby quryldy. Jeltoqsannyń ortasyna qaraı Sý resýrstary jáne ırrıgatsııa mınıstrligi bekitken sýarý sýy shekterin eskere otyryp, negizgi óńirlerdegi egis alqaptaryn paıdalaný josparlary maquldandy.
— Júrgizilgen jumystardyń nátıjesinde osy jyly qoljetimdi sý resýrstarymen, egis qurylymyn teńgerýge qol jetkizildi. Atap aıtqanda, kúrish alqaby 20,2 myń gektarǵa, atap aıtqanda, Qyzylorda oblysynda — 10,9 myń ga, Túrkistan oblysynda — 7,4 myń ga, Almaty oblysynda — 1,9 myń gaktarǵa qysqardy. Bul sharalar maýsymdyq sý tutynýdy edáýir qysqartýǵa múmkindik beredi, — delingen AShM habarlamasynda.
Maqta alqabynyń jalpy kólemi 162,4 myń gektar, onyń shamamen jartysy ıaǵnı, 79,8 myń gektary tamshylatyp sýarýǵa kóshiriledi. Bul tehnologııany 29,8 myń gektarǵa keńeıtý jáne dástúrli sýarý ádisterin 12 myń gektarǵa qysqartý sýdy únemdeýmen qatar ónimdilikti arttyrýǵa jol ashady.
Qańtar aıynda Almaty oblysy men Jetisý óńiriniń agrarlyq sala ókilderimen ótken qosymsha keńester ártaraptandyrý baǵytynyń jalǵasatynyn jáne zamanaýı agrotehnologııalardy engizý jumystarynyń kúsheıtiletinin rastady. Osylaısha, ekonomıkalyq tıimdilik pen tabıǵı resýrstardy ornyqty paıdalaný arasyndaǵy tepe-teńdikke negizdelgen maýsymdyq sý tutynýdyń jańa modeli qalyptasyp jatyr.
Aıta ketelik aýyl sharýashylyǵynda biryńǵaı tsıfrlyq ekojúıe qurý máselesi qaraldy.