Elde MÁMS aıasyndaǵy qyzmet kórsetýshilerge jańa talaptar engiziledi
ASTANA. KAZINFORM — Qazaqstannyń Densaýlyq saqtaý mınıstrligi MÁMS pen TMKKK júıesindegi qyzmet kórsetýshilerge qoıylatyn talaptardy kúsheıtedi, dep habarlaıdy Kazinform tilshisi.
Densaýlyq saqtaý mınıstrligi Tegin medıtsınalyq kómektiń kepildik berilgen kólemi (TMKKK) jáne Mindetti áleýmettik medıtsınalyq saqtandyrý (MÁMS) sheńberinde medıtsınalyq kómek kórsetetin densaýlyq saqtaý sýbektilerin esepke alý qaǵıdalaryna ózgerister engizý týraly buıryq jobasyn qoǵamdyq talqylaýǵa shyǵardy.
Qujat medıtsınalyq uıymdardy esepke alý qaǵıdalaryn jetildirýdi kózdeıdi jáne medıtsınalyq kómektiń sapasy men qaýipsizdigin arttyrýǵa baǵyttalǵan.
Jobaǵa berilgen túsindirmede usynylyp otyrǵan ózgerister TMKKK jáne MÁMS júıesinde jumys isteıtin barlyq medıtsınalyq uıymdar úshin biryńǵaı ári ashyq talaptar qalyptastyrýǵa, sondaı-aq turǵyndardyń óńirine qaramastan sapaly medıtsınalyq qyzmetterge teń qoljetimdiligin qamtamasyz etýge baǵyttalǵany atap ótilgen.
Atap aıtqanda, joba aıasynda «Halyq densaýlyǵy jáne densaýlyq saqtaý júıesi týraly» kodekske sáıkes birqatar normalar jańartylmaq. Sonyń ishinde densaýlyq saqtaý ınfraqurylymyn damytýdyń óńirlik perspektıvalyq jospary uǵymy naqtylanady.
Sonymen qatar TMKKK men MÁMS aıasynda medıtsınalyq kómek kórsetetin uıymdarǵa qoıylatyn biryńǵaı talaptardy bekitý usynylyp otyr. Olar qajetti materıaldyq-tehnıkalyq bazanyń, zamanaýı medıtsınalyq jabdyqtardyń, jetkilikti kadrlyq áleýettiń bolýyn jáne belgilengen standarttardyń saqtalýyn qamtıdy.
Densaýlyq saqtaý mınıstrliginiń málimetinshe, ózgeristerdi iske asyrý medıtsınalyq uıymdardy esepke alý júıesiniń ashyqtyǵyn arttyrýǵa, adal qyzmet kórsetýshiler úshin teń jaǵdaı jasaýǵa, bıýdjet qarajatyn paıdalaný tıimdiligin arttyrýǵa jáne azamattardyń densaýlyq saqtaý júıesine degen senimin nyǵaıtýǵa múmkindik beredi.
Vedomstvo usynylyp otyrǵan túzetýler patsıentterdiń medıtsınalyq kómek alý quqyǵyna áser etpeıtinin, medıtsınalyq qyzmet kólemin qysqartýdy kózdemeıtinin jáne azamattarǵa qosymsha mindettemeler júktemeıtinin atap ótti.
Buıryq jobasyn qoǵamdyq talqylaý «Ashyq NQA» portalynda 2026 jylǵy 17 maýsymǵa deıin jalǵasady.
Eske salaıyq, buǵan deıin Qazaqstandaǵy otandyq dári-dármek óndirisi 39,8%-ǵa jetkenin jazǵan bolatynbyz.
