Elde mal bordaqylaý jumystary belsendi atqaryla bastaǵanda ǵana básekege qabiletti et týraly aıtýǵa bolady - forým
ASTANA. Shildeniń 30-y. QazAqparat /Aıdar Ospanalıev/ -«Ókinishke oraı elimizde mal sharýashylyǵy salasynyń eksporttyq áleýeti ázirge joǵary dep aıta almaımyz.
Eń bastysy, bizge qazir osy salany damytýǵa baǵyttalǵan arnaıy baǵdarlamany iske qosý mańyzdy bolyp otyr», dedi Aýyl sharýashylyǵy mınıstrliginiń Jaýapty hatshysy Evgenıı Aman Astanada ótip jatqan I Halyqaralyq mal sharýashylyǵy forýmynda.
Qazir elde bordaqylaý alańdaryn salýdyń mańyzy zor. Olar tek endi ǵana qolǵa alyna bastady. Atalmysh nysandardyń qurylysy aıaqtalyp, elde jappaı ári belsendi túrde bordaqylaý jumystary jolǵa qoıylǵan soń ǵana básekege qabiletti et ónimderin shyǵarý týraly áńgime qozǵaýǵa bolady. «Al qazirgi qoldan soıylǵan maldyń etin básekege qabiletti deý qıyn. Sondyqtan tehnologııalyq jaǵynan jetilgen ónim shyǵarý - básekege qabilettilikti arttyratyn birden bir jol», dedi E.Aman.
Onyń sózine qaraǵanda, Qazaqstanǵa qazir ana elden kelgen nemese myna elden kelgen et dep jatpaı, naryqtaǵy bar ettiń ózimen básekege qabletti bolý kerek. «Sonymen qatar bizge ishki naryqty da etpen qamtamasyz etý qajettigin esten shyǵarmaǵan jón. Bizge osy ýaqytta naryqty qus etimen tolyq qamtamasyz etý jaǵyn da nazarda ustaý qajet. Óıtkeni búgingi tańda ishki naryq tek 40 paıyzǵa ǵana qus etimen qamtamasyz etilgen. Sondyqtan qazir elimizde salynyp jatqan 5 qus ósiretin fabrıka ishki jáne syrtqy naryqtaǵy qajettilikterdi qanaǵattandyrady degen úmit bar», dedi Jaýapty hatshy.
