Elde mádenı murany qorǵaý jónindegi mamandardy daıarlaý kúsheıtiledi
ASTANA.KAZINFORM — ıÝNESKO men ISESKO aıasynda mádenı murany saqtaý jáne ilgeriletýdiń 2026–2028 jyldarǵa arnalǵan keshendi jospary sheńberinde mádenı murany qorǵaý salasynda mamandar daıarlaýdy kúsheıtý kózdelgen. Bul týraly Úkimettiń baspasóz qyzmeti habarlady.
Bul týraly ıÝNESKO jáne ISESKO isteri jónindegi Qazaqstan Respýblıkasynyń Ulttyq komıssııasy janyndaǵy Materıaldyq emes mádenı murany qorǵaý komıteti tóraǵasynyń orynbasary Rýstam Muzafarov aıtyp berdi.
— Keshendi jospar taǵy bir óte mańyzdy máseleni — murany qorǵaý salasynyń mamandaryn daıarlaýdy kózdeıdi. Sońǵy jyldary bul baǵytta ıÝNESKO aıtarlyqtaı qoldaý kórsetip keledi. Biz mamandarymyzdy, eń aldymen, oblystyq jáne aýdandyq deńgeıde daıarlap jatyrmyz, óıtkeni mádenı mura úlken qalalarda ǵana ómir súrmeıdi, ony sezinip, qadirin túsinetin jerlerde ómir súredi, — dep atap ótti ǵalym.
Aıta ketelik elde mádenı murany saqtaýdyń 2026–2028 jyldarǵa arnalǵan keshendi jospary bekitildi.
