Elde qus etin nıtratsyz 20 kúnge deıin saqtaıtyn jańa tehnologııa engizildi
ASTANA. KAZINFORM – Ázirleme Qazaq qaıta óńdeý jáne taǵam ónerkásibi ǵylymı-zertteý ınstıtýty mamandaryna tıesili.
Qazaqstandyq ǵalymdar salqyndatylǵan qus etiniń saqtaý merzimin nıtrattar men nıtrıtterdi qoldanbaı, 0±1 °C temperatýrada 20 táýlikke deıin, ıaǵnı shamamen úsh esege arttyrýǵa múmkindik beretin ınnovatsııalyq tehnologııany usyndy. Bul sheshim ishki naryqty damytýǵa jáne salanyń eksporttyq áleýetin keńeıtýge jol ashady.
Atalǵan ınstıtýt Ulttyq agrarlyq ǵylymı-bilim berý ortalyǵy qurylymyna kiredi.
Innovatsııanyń negizin sút sarysýy men Lactococcus lactis ssp. lactis F-116 gıbrıdti shtamynyń bakterıotsıni negizinde jasalǵan antımıkrobtyq taǵamdyq jabyn quraıdy. Ázirlengen bıokonservant Pseudomonas, Salmonella jáne Listeria sekildi negizgi patogenderdiń damýyn tejeıdi. Sonymen qatar, onyń quramynda ýly hımııalyq qospalar joq jáne ol «Clean Label» halyqaralyq tujyrymdamasyna saı keledi.
Bul jabyndy qoldaný salqyndatylǵan shıkizattyń mıkrobıologııalyq buzylýyn edáýir baıaýlatyp, uzaq ýaqyt boıy sapasyn saqtaýǵa múmkindik beredi.
FAO derekterine sáıkes, 2030 jylǵa qaraı qus eti álemdik et naryǵynyń shamamen 41%. Mundaı jaǵdaıda salqyndatylǵan ónimniń saqtaý merzimin uzartý básekege qabilettiliktiń strategııalyq mańyzdy faktoryna aınalmaq.
— Saqtaý merzimin 20 táýlikke deıin uzartý jetkizý logıstıkasynyń aýqymyn keńeıtip, ónimniń buzylýynan bolatyn shyǵyndardy azaıtady, salqyndatylǵan et eksportyn ulǵaıtyp, ónimniń qosylǵan qunyn arttyrady.
2023–2025 jyldary júrgizilgen zertteýler aıasynda ǵalymdar qus etiniń krıoskopııalyq jáne shekti salqyndatý temperatýralaryn anyqtady, qabyqsha túzýshi quramnyń ońtaıly kontsentratsııasyn negizdep, ushalardy óńdeý boıynsha usynymdar ázirledi, uzaq merzimdi saqtaý kezinde organoleptıkalyq kórsetkishterdiń saqtalatynyn dáleldedi jáne jabyndy jaǵý boıynsha tehnologııalyq nusqaýlyq daıyndady, — delingen AShM habarlamasynda.
Tehnologııa óndiristik synaqtan ótip, «Medeý 55» áleýmettik kásipkerlik korporatsııasyna engizildi.
Ázirleme otandyq mıkroorganızm shtamdary men sút sarysýyn paıdalanýǵa negizdelgen. Bul aýyl sharýashylyǵy shıkizatyn tereń óńdeýge jáne ımporttyq taǵamdyq qospalarǵa táýeldilikti azaıtýǵa yqpal etedi.
Tehnologııa aýqymdy deńgeıde qoldanýǵa daıyn ári qazaqstandyq et ónimderiniń ishki jáne syrtqy naryqtardaǵy básekege qabilettiligin arttyrýdyń tıimdi quraly bola alady.
Aıta ketelik Jambyl oblysynda jylyna 70 myń tonna qus etin óńdeıtin zaýyt iske qosyldy.