Elde qurylys materıaldaryna suranys óte joǵary – Asqar Mamın

NUR-SULTAN. QazAqparat – Búgin Úkimet otyrysynda QR Premer-Mınıstri «Qarapaıym zattar ekonomıkasy» baǵytynda tapsyrmalar berdi, dep habarlaıdy QazAqparat tilshisi.

«Elde qurylys materıaldaryna suranys óte joǵary. Osyǵan baılanysty «Qarapaıym zattar ekonomıkasy» jeńildikti nesıeleý baǵdarlamasy aıasynda qazirgi kezde otandyq qurylys ındýstrııasy boıynsha 178 mlrd teńgeni quraıtyn 33 joba iske asyrylyp jatyr (shyny, armatýra, sanfaıans, keramıka taqtasha, lak boıaýyn shyǵarý). Olardy iske qosý turǵyn úı qurylysynda qazaqstandyq úlesti 95 paıyzǵa arttyrýǵa jáne 8 myńdaı jańa jumys ornyn qurýǵa múmkindik beredi», - dedi A. Mamın «Nurly jer» baǵdarlamasynyń iske asyrylýyn talqylaý kezinde.

Úkimet basshysy Indýstrııa jáne ınfraqurylymdyq damý mınıstrligine «Atameken» UKP-men birlesip, «Qarapaıym zattar ekonomıkasy» baǵdarlamasy aıasynda júzege asyrylyp jatqan qurylys ındýstrııasy jobalarynyń ýaqytyly engizilýin qamtamasyz etýdi jáne otandyq jańa óndiristerdi qurý jumysyn kúsheıtýdi tapsyrdy.

Osy oraıda Asqar Mamın saladaǵy jalpy baqylaý sharalaryn orynbasary Roman Sklıarǵa júktedi.