Elde qurylys nysandaryn ınjenerlik jelilerden ajyratýdyń jańa tártibi bekitildi
ASTANA. KAZINFORM — Qazaqstanda qurylys nysandaryn ınjenerlik-tehnıkalyq qamtamasyz etý jelilerinen ajyratý tártibin aıqyndaıtyn jańa qaǵıdalar bekitildi. Tıisti buıryqqa 2026 jylǵy 19 maýsymda Ónerkásip jáne qurylys mınıstri qol qoıdy, dep habarlaıdy Kazinform tilshisi.
Qujatqa sáıkes, qurylys nysanyn ınjenerlik jelilerden ajyratý aldynda oǵan tıisti kommýnaldyq resýrstardy berý toqtatylady. Jelilerdi paıdalanýshy uıymdar ótinish kelip túsken kúnnen bastap 10 jumys kúninen keshiktirmeı ajyratý sharttaryn berýge mindetti.
Nysandy buzý maqsatynda ınjenerlik jelilerden ajyratý menshik ıesiniń sheshimi negizinde nemese zańnamada kózdelgen jaǵdaılarda zańdy kúshine engen sot sheshimi ne jergilikti atqarýshy organnyń sheshimi negizinde júzege asyrylady.
Joıýǵa jatatyn nysandar tizbesine engizilgen ǵımarattardy buzýǵa eldi mekenderdi damytý jáne qurylysyn salý jónindegi qala qurylysy jobalary negiz bolady.
Ajyratý sharttaryn alý úshin merdiger uıym, ýákiletti memlekettik organ nemese jergilikti atqarýshy organ ınjenerlik jelilerdi paıdalanýshy uıymǵa tıisti ótinish joldaıdy. Ótinishte ajyratýdy bastamashy tulǵa týraly málimetter, nysannyń ornalasqan jeri, ınjenerlik jelilerdiń túrleri, ajyratýdyń josparlanǵan kúni, sondaı-aq buzýǵa negiz bolǵan sheshimderdiń derektemeleri kórsetiledi.
Ótinishke ótinish berýshiniń ókilettigin rastaıtyn qujattar, nysanǵa nemese jer ýchaskesine quqyq belgileıtin qujattar, sondaı-aq bolǵan jaǵdaıda sot sheshimderiniń nemese jergilikti atqarýshy organnyń buzý týraly sheshimderiniń kóshirmeleri qosa beriledi.
Injenerlik jelilerdi paıdalanýshy uıym ajyratý sharttaryn 10 jumys kúni ishinde tegin berýge mindetti. Qujatta qosylý núktesi, ajyratý kúni men ýaqyty, oryndalýǵa tıis jumystardyń tizbesi, olardy oryndaý merzimi jáne jumystardy júrgizýge baılanysty shyǵyndardy óteý týraly málimetter kórsetiledi.
Qurylys nysanynyń ınjenerlik-tehnıkalyq qamtamasyz etý jelilerinen ajyratylǵany arnaıy aktimen rastalady. Bul aktige ınjenerlik jelilerdi paıdalanýshy uıym qol qoıady. Aktide ajyratýdy bastamashy tulǵa týraly málimetter, oryndalǵan jumystar jáne nysannyń ınjenerlik jelilerden naqty ajyratylǵan núktesi kórsetiledi.
Atalǵan buıryq 2026 jylǵy 1 shildeden bastap qoldanysqa engiziledi.
Eske sala keteıik, buǵan deıin Qazaqstanda elektr energııasy, sý jáne jylý tarıfterin esepteý tártibi ózgertilgen bolatyn.
