Elde qurylys materıaldary óndirisin damytýǵa 775 mlrd teńge baǵyttalady
ASTANA. KAZINFORM — Elde jarty jylda qurylys materıaldaryn óndirý boıynsha 19 jańa joba iske qosyldy, dep habarlaıdy Ónerkásip jáne qurylys mınıstrliginiń baspasóz qyzmeti.
Qurylys materıaldaryn óndirý — ishki naryqty, ımportty almastyrýdy jáne jumys oryndaryn qamtamasyz etetin Qazaqstannyń óńdeý ónerkásibiniń negizgi salalarynyń biri. Onyń damýy aýqymdy ınfraqurylymdyq jáne turǵyn úı jobalary úshin strategııalyq mańyzǵa ıe. Búginde otandyq óndirýshilerdiń ishki naryqtaǵy úlesi 70%-dan asyp otyr, bul baǵytta 3 myńnan astam kásiporyn jumys isteıdi. Jańa óndiris oryndaryn qurý boıynsha júıeli jumystar júrgizilip jatyr.
Jyl basynan beri elimizde keramogranıt plıtkalaryn, PIR sendvıch-panelderin, PVH jáne alıýmınıı fasadtaryn, vıtrajdar men terezelerdi, ALC-panelderdi, jylý oqshaýlaǵysh mıneraldy maqta plıtalaryn, beton qubyrlardy, dánekerlengen qos tavrly arqalyqtardy, profıldi tabaqtardy jáne basqa da ónimderdi shyǵaratyn 19 óndiris orny iske qosyldy. Jobalarǵa salynǵan ınvestıtsııalardyń jalpy somasy shamamen 50 mlrd teńgeni qurady, 1 myńnan astam turaqty jumys orny ashyldy.
Sonymen qatar taǵy 29 kásiporyndy iske qosý boıynsha jumystar júrgizilip jatyr. Osylaısha, jyl sońyna deıin otandyq qurylys materıaldary naryǵynyń qajettiligin 48 jańa óndiris orny qamtamasyz etetin bolady. Olarǵa shamamen 202,2 mlrd teńge ınvestıtsııa tartylyp, 3,5 myńnan astam turaqty jumys orny qurylmaq.
Atap aıtqanda, baspaldaqtar, káriz saqınalaryn, jylý trassalarynyń naýalaryn, mıkrokaltsıtti, modýldik jylyjaı konstrýktsııalaryn, jol qurylysyna arnalǵan topyraq turaqtandyrǵyshy, jasandy mármár jáne basqa da ónimderdi óndirý josparlanǵan.
Іske asyrý kezeńinde jalpy quny 380 mlrd teńge bolatyn taǵy 28 joba bar, olardy 2027-2028 jyldary iske qosý kútilýde. Bul 3,4 myńnan astam turaqty jumys ornyn qurýǵa múmkindik beredi, onyń ishinde shamamen 1,6 myńy — aýyldyq jerlerde. Kásiporyndar joǵary tehnologııalyq temirbeton modýlderin, metall konstrýktsııalaryn, fıbrotsement panelderin, sanıtarlyq keramıkany, gıpsokartondy, qurǵaq qurylys qospalaryn jáne basqa da ónimderdi shyǵarady.
Budan bólek, ártúrli pysyqtaý kezeńderinde quny 192,7 mlrd teńge bolatyn 29 joba bar. Olardyń qatarynda kópir konstrýktsııalaryn, metall esikterdi, qabyrǵalyq panelderdi, shyńdalǵan áınekti, keramzıt bloktaryn, shyny oqshaýlaǵyshtardy, jelilik-aspaly armatýrany jáne basqa da ónimderdi óndirýge baǵytalǵan jobalar bar. Atalǵan jobalar iske asyrylǵan jaǵdaıda 3,5 myńnan astam turaqty jumys orny qurylady.
— Jobalardy iske asyrý otandyq óndiris kólemin ulǵaıtýǵa, shyǵarylatyn ónim túrlerin keńeıtýge, qurylys kesheniniń ımportqa táýeldiligin tómendetýge, óndiristi lokalızatsııalaý deńgeıin arttyrýǵa jáne jańa jumys oryndaryn qurýǵa múmkindik beredi. Barlyǵy bıyl jáne aldaǵy jyldary iske asyrý kózdelgen 105 joba boıynsha shamamen 775 mlrd teńge ınvestıtsııa tartylyp, 10,4 myń turaqty jumys orny qurylady dep josparlanýda, onyń 5,7 myńy aýyldarǵa tıesili bolady, — deıdi QazIndustry jobalardy monıtorıngileý jáne taldaý dırektsııasynyń basshysy Záýre Nurǵalıeva.
Osyǵan deıin Qazaqstanda qurylys materıaldarynyń ımportyna shekteý engizilgenin jazdyq.
