Elde qurylys kompanııalarynyń múddesin qorǵaıtyndar tym kóp sııaqty — Aımaǵambetov

ASTANA. KAZINFORM — Májilis depýtaty Ashat Aımaǵambetov Qurylys kodeksindegi túıtkildi normalar qabyldanbaı jatqanyn synǵa aldy. Bul týraly ol Telegram-arnasynda jazdy.

— Ókinishke qaraı, Qurylys kodeksiniń jobasyna bergen bizdiń mańyzdy túzetýlerimizdiń basym bóligi qabyldanǵan joq. Alda nebári birneshe jumys toby ǵana qaldy — ýaqyt óte az, — dep jazdy depýtat.

Aımaǵambetov ár azamat úshin qajet máselelerdi qozǵap otyrǵanyn aıtty: 

— mektepter men balabaqshalar turǵyn úılerden keıin emes, birge salynýy tıis;

— geologııalyq zertteýler shynaıy bolýy kerek, «satyp alynǵan» jalǵan qorytyndylar emes;

— mektep pen aýrýhanaǵa arnalǵan jerdi qorǵaý, olardyń ornyna túngi klýb nemese dúken salýǵa jol bermeý;

— qurylysshylardyń naqty jaýapkershiligi bolýy tıis, qaǵaz júzindegi jalǵan memorandýmdar emes;

— áleýmettik nysandardy qabyldaý komıssııalaryna qoǵam ókilderi qatysýy tıis;

— sapasyz qurylys úshin naqty jáne qatań aıyppuldar men jaýapkershilik engizilýi qajet.

— Ázirshe osy kúıinde, bul normalarsyz Kodeksti qabyldaýǵa bolmaıdy. Zań adamdardy qorǵaýy kerek, qurylys kompanııalaryn emes. Elde Qurylys kompanııalarynyń múddesin qorǵaıtyndar tym kóp sııaqty, — dep atap ótti Ashat Aımaǵambetov.

Budan buryn Májilis depýtaty Ashat Aımaǵambetov jańa Qurylys kodeksiniń jobasynan mektep pen balabaqshalarǵa qatysty mańyzdy normalar alynyp qalǵanyn málim etken edi.