Elde kýrerlerge tumaýǵa qarsy vaktsınany tegin saldyrý máselesi pysyqtalyp jatyr

ASTANA. KAZINFORM — Qazaqstanda maýsymdyq tumaýdyń taralýyna baılanysty vaktsına ektiretinderdiń sany artty ma? Bul suraqqa Densaýlyq saqtaý mınıstri Aqmaral Álnazarova jaýap berdi.

— Vaktsına alatyndardyń sanyn ekige bólýge bolady, ıaǵnı óz betinshe aqyly túrde ekpe saldyratyndar jáne 2 mıllıonnan astam vaktsınany tegin alatyndar bar. Osy oraıda jyl saıyn halyqtyń 10-11 paıyzy vaktsınalaýmen qamtylyp keledi. Basqa eldermen salystyrsaq, Dúnıejúzilik densaýlyq saqtaý uıymynyń 10 paıyzdyq mejeden tómen bolmaýy kerek degen nusqaýy bar, — dedi A. Álnazarova Kazinform tilshisine bergen suhbatynda.

Onyń aıtýynsha, elimizde túrli taýarlar men azyq-túlik tasymaldaıtyn kýrerler men taksısterge tumaýǵa qarsy vaktsınany tegin saldyrý máselesi pysyqtalyp jatyr.

— Qazir Reseıdiń tájirıbesin qarap jatyrmyz. Kórshi elde kýrerlerdi de vaktsınamen qamtydy. Osy oraıda keler jyly bul taqyrypty kóteremiz, — dedi mınıstr.

Sonymen qatar ol mindetti túrde vaktsınamen qamtylýy tıis kontıngenttiń arasynda vaktsınadan bas tartý jaǵdaılary jıilep bara jatqanyn atap ótti.

Aıta keteıik, búginde vaktsınadan bas tartý — jahandyq másele. Qazaqstanda da bul problema bar. QR DSM Sanıtarııalyq-epıdemıologııalyq baqylaý komıtetiniń tóraǵasy Sarhat Beısenovanyń sózine qaraǵanda, 2017 jyly vaktsına egýden bas tartqandardyń sanyna qaraǵanda, bıyl bul kórsetkish 3,8 paıyzǵa ósti. Máselen, buryn 5 300 adam ekpeden bas tartsa, bıyl olardyń sany 20 myńǵa jýyqtady. 

Tumaýǵa qarsy vaktsına egý jumystary búkil respýblıka boıynsha 15 qyrkúıekte bastalady.