Elde quny 1,4 mlrd dollarlyq jel elektr stantsııasy salynady
ASTANA. KAZINFORM — Qazaqstannyń ońtústiginde jańartylatyn energııa kózderi salasyndaǵy eń aýqymdy ınvestıtsııalyq jobalardyń biri iske asyryla bastady.
Búgin Jambyl oblysynda qýaty 1 Gıgavatt (GVt) bolatyn jel elektr stantsııasynyń qurylysyna resmı túrde start berildi. Quny shamamen 1,4 mıllıard AQSh dollaryna teń joba elimizdiń ońtústik óńirlerindegi elektr energııasy tapshylyǵyn retteýge baǵyttalǵan.
Qurylys alańyna saltanatty kapsýla salý rásimi telemost formatynda ótti.
Energetıka mınıstrliginiń ókili jobanyń negizgi makroekonomıkalyq mańyzyna toqtaldy.
— Masdar kompanııasymen áriptestik jańartylatyn energetıkany damytýǵa jáne Qazaqstannyń kómirtegi beıtaraptyǵyna qol jetkizýine yqpal etedi. Bul joba óńirdiń energetıkalyq qaýipsizdigin nyǵaıtyp, jańartylatyn energııa kózderi sektoryna zamanaýı tehnologııalardy tartýǵa múmkindik beredi. Biz seriktesterimizdiń elimizdiń ornyqty damýyna ınvestıtsııa salýǵa degen ázirligin joǵary baǵalaımyz ári óz tarapymyzdan jobanyń barlyq kezeńiniń tabysty júzege asyrylýyna qajetti qoldaýdy kórsetemiz, — dedi Energetıka vıtse-mınıstri Suńǵat Esimhanov.
Jobanyń tehnıkalyq ereksheligi — jel generatsııasynyń qýatty ónerkásiptik energııa jınaqtaý júıesimen qatar jumys isteýinde. Elektr stantsııasy bastapqy kezeńnen-aq qýaty 300 MVt, syıymdylyǵy 600 MVt/saǵat bolatyn zamanaýı energııa jınaqtaý júıesimen jabdyqtalady. Mundaı akkýmýlıatorlardyń bolýy balamaly energetıkanyń basty máselesin sheshýge múmkindik beredi: aýa raıy qubylǵanda nemese keshki eń joǵary júkteme kezinde de elektr stantsııasy energııany biryńǵaı elektr jelisine turaqty ári senimdi túrde bere alady.
Konsortsıýmnyń ınvestorlary men aktsıonerleri retinde BAÁ-niń taza energetıka salasyndaǵy jetekshi kompanııasy Masdar (úlesi 40%), W Solar qurylymy (40%), sondaı-aq «Samuryq-Qazyna» qorynyń quramyndaǵy «Qazaq Green Power» kompanııasy (18%) jáne Qazaqstannyń ınvestıtsııalyq damý qory — KIDF (2%) qatysady.
Ekologııalyq tıimdilik turǵysynan bul elektr stantsııasy atmosferaǵa bólinetin kómirqyshqyl gazynyń kólemin jyl saıyn 2,5 mıllıon tonnaǵa azaıtyp, Qazaqstannyń bekitilgen memlekettik ekologııalyq kórsetkishterge qol jetkizýine yqpal etedi.
Qurylys alańdaryn daıyndaý jumystary josparǵa sáıkes bastaldy. Jel elektr stantsııasyn tolyq kólemde kommertsııalyq paıdalanýǵa berý 2029 jyldyń úshinshi toqsanyna josparlanǵan.
Aıta ketelik energetıkalyq ınfraqurylym obektileri kúzet aımaqtarynyń biryńǵaı tsıfrlyq tizilimi qurylady.
