Elde krahmal jáne bıohımııa ónimderin shyǵaratyn iri ónerkásiptik park salynady
ASTANA.KAZINFORM — Qazaqstanda Fufeng Group kompanııasy jylyna 1 mln tonna júgerini tereń óńdeý jobasyn júzege asyrady. Bul týraly AShM baspasóz qyzmeti habarlady.
Aýyl sharýashylyǵy mınıstrliginde vıtse-mınıstr Ermek Kenjehanuly Fufeng Group kompanııasynyń («Shengtai Biotech» JShS) basshylyǵymen kezdesti.
Taraptar Jambyl oblysynda júgerini tereń óńdeýge baǵyttalǵan iri ınvestıtsııalyq jobanyń oryndalý barysyn talqylady.
Joba aıasynda ınvestıtsııa kólemi 800 mln AQSh dollar bolatyn, jylyna 1 mln tonna júgerini qaıta óńdeýge qýatty tolyqtaı biriktirilgen ónerkásiptik park salý kózdelgen.
Onyń aıasynda krahmal óndiretin zaýyt, úsh bıofermentatsııa zaýyty, kómirmen jumys isteıtin jylý elektr stantsııasy, sondaı-aq hımııalyq komponentter shyǵaratyn zaýyt salynady. Olardyń ishinara iske qosylýy 2026 jyldyń І toqsanyna mejelengen.
Investor kásiporyndy turaqty túrde shıkizatpen qamtamasyz etý úshin osy jyly ishki naryqtan da, jaqyn shetelderden de 500 myń tonna júgerini satyp alýdy josparlap otyr. Keıin otandyq aýyl sharýashylyǵy taýar óndirýshilerimen aldyn ala kelisimsharttar júıesi jolǵa qoıylady.
Ónim negizinen Eýropalyq Odaq, Soltústik Afrıka jáne Taıaý Shyǵys elderine ótkiziletin bolady. Kezdesý barysynda taraptar memlekettik qoldaý sharalaryn, onyń ishinde sýbsıdııalaý máselelerin jáne shıkizat bazasyn qalyptastyrý tetikterin talqylady.
Vıtse-mınıstr jobany tabysty iske asyrý úshin ınvestorǵa qajetti qoldaý men úılestirý jumystaryn kórsetýge daıyn ekenin bildirdi.
Aıta ketelik «Keń dala 2» baǵdarlamasy 1 qazanda bastalatyny týraly jazǵan edik.