Elde kómir tasymaly 9 aıda 77,8 mln tonnaǵa jetti
ASTANA. KAZINFORM – Elimizde 2026 jyldyń 9 aıynda temirjol kóligimen kómir tasymaldaý kólemi 77,8 mln tonna boldy.
Bul ótken jyldyń sáıkes kezeńimen salystyrǵanda 1,5%-ǵa kóp (2025 jyldyń 9 aıynda — 76,6 mln tonna). Onyń ishinde 25 mln tonna eksportqa jóneltilse, 51 mln tonnadan astamy el ishinde tasymaldandy.
Jańa jylytý maýsymyna daıyndyq bastalǵaly, aǵymdaǵy jyldyń 1 mamyry men 30 qyrkúıegi aralyǵynda respýblıka boıynsha 28,1 mln tonna kómir tasymaldandy. Bul kólem ótken jylǵy tıisti kezeńdegi kórsetkishpen birdeı. Onyń ishinde 25,8 mln tonna kómir jylý elektr ortalyqtaryna (JEO), 2,3 mln tonna kommýnaldyq-turmystyq qajettilikterge jóneltildi. Barlyq JEO-da otyn qory belgilengen normatıvten joǵary nemese normatıvtik deńgeıde.
Aǵymdaǵy jylytý maýsymynda kommýnaldyq-turmystyq qajettilikterge arnalǵan kómirge josparly suranys 7,3 mln tonna. Bul ótken maýsymmen salystyrǵanda 154 myń tonnaǵa az. Suranystyń tómendeýi eldegi gazdandyrý deńgeıiniń artýyna baılanysty.
Tasymaldaýdy qamtamasyz etý úshin jalpy parki 27 myń jartylaı vagonnan turatyn «Qaztemirtrans» AQ-nyń 18,5 myń vagony jumyldyryldy. Júkteme joǵary kezeńderde 3 myń vagonǵa deıin rezerv qalyptastyrylady. Jyljymaly quram parki kómir tasymaldaý qajettiligin tolyq qamtamasyz etedi.
Jylytý maýsymyna kómir tasymaldary shtattyq rejımde júzege asyrylýda. Jyljymaly qurammen qamtamasyz etý boıynsha shekteýler men máseleler baıqalmaıdy.
Aıta ketelik Astanada kómir qansha turady jáne qaıdan satyp alýǵa bolatyny týraly jazǵan edik.
