Elde kómir óndirisi artady: iri kompanııalar josparlaryn jarııalady
ASTANA. KAZINFORM — Qazaqstan jańa jobalarǵa qajet 19 mln tonna kómirdi óndiris qýatyn arttyrý arqyly qamtamasyz etedi, dep habarlaıdy Energetıka mınıstrliginiń baspasóz qyzmeti.
Energetıka vıtse-mınıstri Erlan Aqbarov eldegi iri kómir óndirýshi kompanııalarymen keńes ótkizdi. Jıynda Prezıdenttiń V Ulttyq quryltaıda tapsyrǵan mindetterin oryndaý barysy talqylandy.
Kezdesýdiń basty taqyryby — kómir generatsııasyn damytýǵa arnalǵan jańa Ulttyq jobany ázirleý boldy. Joba 33 mlrd tonnadan astam qory bar kómirdi Qazaqstan úshin strategııalyq mańyzdy resýrs retinde bekitýge baǵyttalǵan.
Vıtse-mınıstrdiń aıtýynsha, joba tek elektr energııasyn óndirýmen shektelmeıdi. Joba salany keshendi damytýǵa negizdeledi. Osy arqyly ınvestıtsııa tartý, otyn-logıstıkalyq ınfraqurylymdy jańǵyrtý, ekologııalyq tehnologııalardy engizý jáne kadrlyq áleýetti kúsheıtý kózdelip otyr.
Qazirgi boljam boıynsha, 2032 jylǵa qaraı jańa jobalar úshin energetıkalyq kómirge degen suranys jylyna 19 mln tonnadan asady. Sondyqtan óndiris qýatyn jedel arttyrý qajettigi týyndap otyr.
Keńes barysynda «Taý-ken óndirýshi jáne taý-ken metallýrgııalyq kásiporyndardyń respýblıkalyq qaýymdastyǵynyń» atqarýshy dırektory Nıkolaı Radostovets, «Bogatyr Kómir» JShS bas dırektory Evgenıı Masternak jáne «Shubarkól Kómir» AQ-nyń óndiris jónindegi dırektory Pavel Chývashev baıandama jasady. Olar óndiristik qýatty ulǵaıtý josparlaryn usynyp, salany tsıfrlandyrý men ınvestıtsııalyq baǵdarlamalarǵa erekshe nazar aýdardy.
Atap aıtqanda, «Bogatyr Kómir» JShS 2024 jylǵy 42,7 mln tonna óndiris kólemin 2026 jylǵa qaraı 45,2 mln tonnaǵa deıin, al 2032 jylǵa qaraı 56,5 mln tonnaǵa jetkizýdi josparlap otyr. Kompanııa 2032 jylǵa deıin TsTT (tsıkldi-tolassyz tehnologııa) nysandaryn salýǵa, tehnıka alýǵa jáne óndiristi jańǵyrtýǵa 360 mlrd teńge baǵyttaıdy. Sonymen birge, tıimdilik pen qaýipsizdikti arttyrý úshin TsTT-nyń MES júıesi jáne júk aǵyndaryn ońtaılandyrý quraldary engizilip jatyr.
«Shubarkól Kómir» AQ-ta óndiristi ulǵaıtýǵa daıyn ekenin málimdedi. Kompanııa 2026 jyly kómir óndirý kólemin 16,1 mln tonnaǵa deıin arttyrýdy kózdeıdi. 2026-2032 jyldarǵa arnalǵan ınvestıtsııalyq strategııa aıasynda 95,5 mlrd teńge tehnıkalyq qaıta jaraqtandyrýǵa jáne tsıfrlyq tehnologııalardy engizýge baǵyttalady. Josparda TsTAK-2 (tsıkldi-tolassyz arshý kesheni) qurylysynyń ekinshi kezeńin iske asyrý, 49,4 mlrd teńgege jabdyqtar parkin jańartý, sondaı-aq Hovermap júıesin jáne robottandyrylǵan avtoaýdarǵyshtardy (samosval) engizý qarastyrylǵan.
Keńesti qorytyndylaǵan Erlan Aqbarov jartylaı vagondar parkin keńeıtý men temirjol ınfraqurylymyn jańǵyrtýdy qatar júrgizýdiń mańyzyn atap ótti. Bul otyn jetkizilimin turaqty qamtamasyz etip, eldiń energetıkalyq qaýipsizdigin nyǵaıtýǵa múmkindik beredi.
Buǵan deıin Kazinform tilshisi kómir generatsııasyn damytý jobasyna qatysty maqala jarııalap, eldegi energetıkalyq qaýipsizdik qalaı qamtamasyz etiletinin zerdelep kórgen edi.