Elde kommýnaldyq sektordaǵy qaldyqtardyń 25 paıyzy ǵana qaıta óńdeledi

ASTANA. KAZINFORM – Kommýnaldyq sektorda jyl saıyn 4,5 mln tonna qaldyq túziledi. Bul týraly Úkimet otyrysynda QR Ekologııa jáne tabıǵı resýrstar vıtse-mınıstri Jomart Álıev málim etti.

- Ekonomıkanyń ósýi, qurylys kóleminiń artýy jáne tutynýdyń ózgerýi barlyq sanattaǵy qaldyqtardyń kóbeıýine alyp keldi. Negizgi úles ónerkásiptik qaldyqtarǵa tıesili, jyl saıyn júzdegen mıllıon tonna tehnogendik mıneraldar jınalady. Kásiporyndarda qaldyqtardy qaıta óńdeýge yntalandyratyn nemese mindetteıtin mehanızmder joq, sol sebepti qaldyqtar jyldar boıy jınalyp, ekologııalyq qaýip týdyryp jatyr.

Kommýnaldyq sektorda jyl saıyn shamamen 4,5 mln tonna qaldyq túziledi, alaıda onyń tek 25–26 protsenti ǵana qaıta óńdeledi. Qaldyqtyń basym bóligi ekologııalyq jáne sanıtarlyq talaptarǵa saı kelmeıtin polıgondarǵa jiberiledi, - dedi J. Álıev.

Onyń aıtýynsha, taǵam qaldyqtary ár aımaqqa baılanysty turmystyq qaldyq massasynyń 30-40 paıyzyn quraıdy, biraq olardy óńdeýge arnalǵan ınfraqurylym is júzinde joq.

- Qurylys qaldyqtary zań boıynsha kómýge bolmaıtynyna qaramastan, áli de polıgondarǵa túsip jatyr nemese stıhııalyq qoqys sanyn kóbeıtip jatyr. Osylaısha, qaldyqtardy basqarý salasy ózara baılanysty ekologııalyq, ekonomıkalyq jáne ınstıtýtsıonaldyq syn-qaterlermen betpe-bet kelip otyr, - dedi vıtse-mınıstr.

Budan buryn habarlanǵandaı, elimizde 178 mlrd teńgege jýyq qaıta óńdeletin qaldyqtar polıgonda kómilip jatyr.