Elde kólik, ónerkásip jáne áleýmettik ınfraqurylym salalaryndaǵy jańa jobalar iske qosyldy
ASTANA. KAZINFORM — Úkimettiń baspasóz qyzmeti shilde aıynyń basynan beri iske qosylǵan negizgi jobalar týraly málimet berdi.
Memleket basshysynyń tapsyrmalaryn júzege asyrý aıasynda Qazaqstanda ónerkásiptik áleýetti nyǵaıtý jáne kólik-logıstıka ınfraqurylymyn jańǵyrtý jumystary jalǵasyp jatyr.
Kólik jáne jol ınfraqurylymy
30 temirjol vokzaly jańǵyrtyldy: Elimiz boıynsha vokzal ınfraqurylymyn aýqymdy jańǵyrtý aıaqtaldy. Shatyrlar, qasbetter men ınjenerlik jeliler jańartylyp, pandýstar, lıftiler jáne taktıldi jolaqtar ornatylyp, kedergisiz orta qalyptastyryldy.
Túrkistan oblysyndaǵy jol jóndeldi: Saýran aýdanynda oblystyq mańyzy bar «Túrkistan – Kentaý – Eńbekshi – Dıqan» avtojolynyń 4 shaqyrymdyq ýchaskesi paıdalanýǵa berildi. Jalpy respýblıka boıynsha respýblıkalyq mańyzy bar avtojoldardyń 120 shaqyrymyna asfalt tóseldi.
Sý sharýashylyǵy jáne qaýipsizdik
Úlken Almaty kanaly: D. Qonaev atyndaǵy kanaldyń 1,5 shaqyrymdyq apatty ýchaskesi qaıta jańǵyrtyldy. Bul 33,3 myń gektar aýyl sharýashylyǵy jerin sýmen qamtamasyz etýdi jaqsartady.
«Naıman» kanaly (Túrkistan oblysy): Uzyndyǵy 26 shaqyrym bolatyn kanal jańǵyrtylyp, sý shyǵynyn azaıtý úshin 75 gıdrotehnıkalyq nysan salyndy.
Kırov sý qoımasy (Batys Qazaqstan oblysy): Toǵan aýylynda gıdrotehnıkalyq qurylystardy jańartý jumystary aıaqtalyp, tasqyn sýdy qaýipsiz ótkizý jáne eldi mekenderdi qorǵaý múmkindigi kúsheıtildi.
Ónerkásip jáne ınvestıtsııalar
Optıkalyq kabel shyǵaratyn zaýyt: Kentau Cable Industries kásiporny (ınvestıtsııa kólemi – 1,7 mlrd teńge) jylyna 33 myń shaqyrym optıkalyq kabel óndiredi. Bul joǵary jyldamdyqtaǵy ınternet jelilerin damytýǵa múmkindik beredi. Kásiporynda 100 jańa jumys orny ashyldy.
ElectroCore elektr jabdyqtary zaýyty: Arnaıy tehnıkaǵa arnalǵan metall shkaftar óndirisi iske qosyldy. Jobaǵa 1,5 mlrd teńge ınvestıtsııa salyndy. Zaýyttyń jyldyq qýaty – 12 myń ónimge deıin. 100 jańa jumys orny quryldy.
Áleýmettik ınfraqurylym
Aqtóbedegi kúres ortalyǵy: Grek-rım jáne erkin kúreske arnalǵan jańa dene shynyqtyrý-saýyqtyrý kesheni ashyldy. Ortalyq bir mezgilde 200-ge deıin sportshynyń jattyǵýyna múmkindik beredi.
