Eldegi qyzmettik qarýdy saqtaý isinde kemshilikter anyqtaldy - ІІM
ASTANA. KAZINFORM — Elde 2 - 14 aqpan aralyǵynda «Zań men tártip» qaǵıdaty aıasynda qarýdy qoldaný erejeleriniń saqtalýyna arnalǵan «Qyzmettik qarý» operatsııasy ótip jatyr. Bul týraly QR Іshki ister mınıstrligi habarlady.
Osy is-sharanyń negizgi maqsaty – qyzmettik qarýdy paıdalanatyn zańdy tulǵalardyń tekserý. Atap aıtqanda, ortalyqtandyrylǵan saqtaý pýnktteri, qarý-jaraq dúkenderi, jeke kúzet uıymdary, atys tırleri, orman jáne janýarlar dúnıesin qorǵaý mekemeleri, ańshylyq sharýashylyqtary sekildi nysandardyń qyzmettiń qarýdy saqtaýdaǵy zań talaptaryn oryndaýy nazarǵa alyndy.
– Jalpy, ishki ister organdarynyń esebinde shamamen eki myń obekti tur. Úsh kúnniń ishinde 652 obekti tekserilip, talaptardy oryndamaýdyń 75 deregi anyqtaldy. Sonyń ishinde 55-i qarý aınalymy erejesin oryndamaýǵa, al 20-sy qyzmettik qarýdy tirkeý tártibin buzýǵa qatysty. Máselen, Kostanaıda ortalyqtandyrylǵan saqtaý pýnktin tekserý kezinde birqatar kemshilik anyqtaldy. Bul nysannyń basshysy jaýapqa tartylyp, qarý tárkilendi. Sondaı-aq osy qarýdyń bári ishki ister organynyń qoımasyna tapsyryldy, – delingen habarlamada.
Sonymen qatar, atalǵan operatsııa barysynda polıtseıler obektilerdiń basshylary men qyzmetkerlerine qarýdy saqtaý qaǵıdalaryn egjeı-tenjeıli túsindiredi.
Aıta keteıik, byltyr el aýmaǵynda zańmen tyıym salynǵan qarý-jaraq aınalymyn anyqtaý maqsatynda 400-den astam reıdtik is-shara ótkizildi.
Arýjan Jánádil
