Elde qyzmetin adal atqarmaıtyn qurylys salýshylardyń tizilimi qurylady
ASTANA. KAZINFORM — «Ashyq NQA» portalynda QR Ónerkásip jáne qurylys mınıstriniń «Josyqsyz qurylys salýshylardyń tizilimin qalyptastyrý jáne júrgizý jónindegi Úlgilik qaǵıdalardy bekitý týraly» buıryǵynyń jobasy jarııalandy.
Buıryq jobasy qyzmetin adal atqarmaıtyn qurylys salýshylardyń tizilimin qalyptastyrý jáne júrgizý tártibin aıqyndaıtyn Úlgilik qaǵıdalardy bekitedi. Tizilim salynyp jatqan obektiler ornalasqan jeri boıynsha jergilikti atqarýshy organ (JAO) tarapynan turǵyn úı qurylysyna úlestik qatysýdyń biryńǵaı aqparattyq júıesi arqyly elektrondyq nysanda júrgiziledi.
Tizilimniń táýekelge baǵdarlanǵan qurylymy jáne 4 sanaty belgilenedi:
- 1-sanat - habarlamalyq;
- 2-sanat - táýekeli joǵary;
- 3-sanat - zańda kózdelgen negizder boıynsha;
- 4-sanat - problemalyq nysandar.
Tizilimge engiziletin málimetterdiń quramy, aqparat kózderi, sondaı-aq derekterdi tolyq, durys jáne ýaqtyly engizý jónindegi JAO-nyń mindetteri aıqyndalady.
- Tizilimge engizýdiń saldary (kúsheıtilgen baqylaý; 3–4-sanattar boıynsha úleskerlerdiń qarajatyn tartýǵa shekteý), ashyq aqparatty usyný tártibi jáne JAO sheshimderine shaǵymdaný tártibi bekitiledi, - delingen qujatta.
Mınıstrlik aqparatyna qaraǵanda, buıryq jobasy qurylys salýshylar men problemalyq nysandardy esepke alýdyń biryńǵaı, túsinikti jáne táýekelge baǵdarlanǵan tetigin qalyptastyrý, sondaı-aq úleskerlerdiń quqyqtyq qorǵalý deńgeıin arttyrý jáne qurylys salýshyny/obektini tańdaýda táýekelderdi tómendetý maqsatynda ázirlendi. Budan bólek, qujatta naryq qatysýshylarynyń tártibin kúsheıtý jáne úlestik turǵyn úı qurylysynyń ashyqtyǵyn arttyrý, málimetterdi Tizilimge engizý/shyǵarý jáne qatysýshylardy habardar etý boıynsha jergilikti atqarýshy organdardyń (JAO) birizdi tájirıbesin qamtamasyz etý.
Qujat jobasy qoǵamdyq talqylaýda 20 sáýirge deıin bolady.
Aıta keteıik, buǵan deıin úlestik qurylysta qandaı zańnamalyq ózgerister bolǵanyn jazǵan edik.
