Elde qyzmetkerdiń skrınıngtik zertteýden ótý tártibi naqtylandy
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine eńbek zańnamasyn jetildirý máseleleri boıynsha ózgerister men tolyqtyrýlar engizý týraly» Zań eki oqylymda qaralyp, maquldandy.
Atalǵan zań QR Parlamenti depýtattarynyń bastamashyldyǵymen ázirlengen. Zańnyń negizgi maqsaty – jumyskerlerdiń quqyqtaryn qorǵaý kepildikterin kúsheıtý, áleýmettik áriptestikti damytý, eńbek qaýipsizdigi standarttaryn arttyrý jáne eńbek qatynastarynyń negizgi rásimderin naqtylaý jónindegi eńbek zańnamasyn odan ári jetildirý.
- Zańmen qoldanystaǵy Eńbek kodeksine, «Halyq densaýlyǵy jáne densaýlyq saqtaý júıesi týraly» kodeksine jáne «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zańyna ózgerister men tolyqtyrýlar engiziledi. Atap aıtqanda, Eńbek kodeksi eńbek salasyndaǵy ar-namys pen qadir-qasıetti qorǵaýǵa baǵyttalǵan jańa qaǵıdattarmen tolyqtyrylyp, jumyskerlerdiń zańdy múddelerin saqtaý, eńbekke ýaqytsha jaramsyzdyq nemese áleýmettik demalys kezeńimen tuspa-tus kelgen jaǵdaılarda sońǵy jumys kúnin aıqyndaý tártibi naqtylanady. Odan bólek, jumyskerlerdiń skrınıngtik zertteýlerden ótý tártibi belgilenip, aýysym aldyndaǵy medıtsınalyq kýálandyrýdan ótýge jumsalǵan ýaqytqa ortasha jalaqy tóleý máselesi retteledi. Sondaı-aq, jumys berýshiniń eńbek jaǵdaılarynyń ózgergeni týraly jumyskerdi jazbasha túrde habardar etý mindeti engiziledi, - dedi senator Rýslan Rústemov.
Sonymen qatar jumys berýshilerge óndiristik protseste paıdalanylatyn barlyq nysandar men eńbek quraldaryn qaýipsizdik talaptaryna sáıkestendirý mindeti júkteledi. Al memlekettik eńbek ınspektorlary úshin eńbek qaýipsizdigi men eńbekti qorǵaý salasynda biliktilikti turaqty arttyrý talaptary engiziledi.
Budan bólek, jergilikti atqarýshy organdardyń áleýmettik áriptestikti uıymdastyrý, óńirlik úshjaqty komıssııalardyń qyzmetin úılestirý jáne eńbek qatynastaryn retteý baǵytyndaǵy ókilettikteri keńeıtiledi. Sondaı-aq eńbekti qorǵaý jónindegi tehnıkalyq ınspektorlardyń quqyqtary men olardyń qyzmetine aqy tóleý tártibi de naqty reglamentteledi.
- «Halyq densaýlyǵy jáne densaýlyq saqtaý júıesi týraly» kodeks jumyskerdiń tirkelgen jeri boıynsha medıtsınalyq uıymǵa jumyskerdi skrınıngtik zertteýlerden ótý qajettiligi týraly habardar etý jáne jumys berýshige skrınıngtik zertteýlerden ótýge jatatyn jumyskerler boıynsha málimetterdi tsıfrlyq tehnologııalar arqyly jiberý boıynsha quzyret beretin normalarmen tolyqtyrylady. Al «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zańǵa jergilikti basqarý organdarynyń eńbek, eńbek qaýipsizdigi jáne eńbekti qorǵaý salasyndaǵy memlekettik saıasatty iske asyrýdy qamtamasyz etý mindetin belgileý bóliginde tolyqtyrýlar engiziledi. Qoryta aıtqanda, zań eńbek zańnamasyn odan ári jetildirý maqsatynda eńbek qaýipsizdigin arttyrý, jumys berýshilerdiń jaýapkershiligin kúsheıtý, tsıfrlandyrýdy engizý jáne eńbek daýlaryn sheshýdi ońtaılandyrýǵa qatysty ózgerister men tolyqtyrýlar engizýdi kózdeıdi, - dedi depýtat.
Buǵan deıin habarlanǵandaı, elimizde árbir jumyskerge medıtsınalyq skrınıngten ótý úshin úsh kúndik zańdy demalys beriledi.
