Elde qyzylsha aýrýyna tosqaýyl qoıýǵa ne kedergi
ASTANA. KAZINFORM — Qazaqstanda qyzamyq pen qyzylsha aýrýyna qatysty jaǵdaı túzeldi me? Onyń taralýyna tosqaýyl qoıý boıynsha qandaı sharalar qabyldanyp jatyr? ? Bul suraqtarǵa QR Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti jaýap berdi.
- 2025 jyldyń qorytyndysy boıynsha elde qyzamyq aýrýy 2024 jylmen salystyrǵanda 85%-ǵa tómendedi. Sonymen qatar, epıdemıologııalyq jaǵdaıdyń tolyq turaqtandyrylýyna qol jetkizilgen joq, qyzylsha jaǵdaılary negizinen 5 jasqa deıingi balalar arasynda tirkelip jatyr (68%), onyń ishinde 74%-y vaktsınatsııalanbaǵan balalar men ekpe mártebesi belgisiz adamdar, - delingen vedomstvonyń Kazinform agenttigine bergen jaýabynda.
Epıdemıologııalyq jaǵdaıdy turaqtandyrý maqsatynda ekpe egý sııaqty epıdemııaǵa qarsy is-sharalar kesheni iske asyp jatyr. Osylaısha, osy jyldyń 8 aıynda 1 jastaǵy 186,7 myń bala jáne 6 jastaǵy 225,6 myń bala qyzamyqqa qarsy josparly vaktsınatsııamen qamtyldy. 2026 jyldyń basynan bastap 18 jasqa deıingi 71,9 myń adam tolyqtaı ımmýnızatsııamen qamtyldy (2025 jyly – 319,5 myń bala, sondaı-aq 70,4 myń medıtsına qyzmetkeri vaktsınatsııalandy).
- Qyzylshanyń ári qaraı taralýynyń aldyn alý maqsatynda Qazaqstan Respýblıkasy Bas memlekettik sanıtarlyq dárigeriniń 2026 jylǵy 19 aqpandaǵy № 3 «Qazaqstan Respýblıkasyndaǵy qyzylsha boıynsha sanıtarııalyq-epıdemııaǵa qarsy jáne sanıtarlyq-profılaktıkalyq is-sharalardy uıymdastyrý jáne ótkizý jónindegi sharalar týraly» qaýlysy qabyldandy. Uıymdastyrylǵan ujymdarda, áskerı bólimderde jáne bilim berý mekemelerinde syrqatqa qarsy sharalar kúsheıtildi, sonyń ishinde qyzylsha jaǵdaılary tirkelgen kezde ekpe jasalmaǵan adamdardy ýaqytsha shettetý qarastyryldy, - dep atalyp ótken komıtet aqparatynda.
Qyzylsha jaǵdaılarynyń negizgi bóligi egilmegen nemese vaktsınatsııa kýrsyn tolyq aıaqtamaǵan adamdar arasynda tirkeletinin atap ótý mańyzdy.
- Sondyqtan ýaqytyly vaktsınatsııa - qyzylshadan qorǵanýdyń jáne onyń ári qaraı taralýynyń aldyn alýdyń eń tıimdi tásili, - dep naqtylady vedomstvo mamandary.
Budan buryn habarlanǵandaı, Bangladeshte qyzylsha indeti órship, myńǵa jýyq bala qaıtys boldy.
