Elde qylmystyq jáne ákimshilik quqyqbuzýshylyq boıynsha raqymshylyq jarııalanady
ASTANA. KAZINFORM — Jaqyn arada birqatar mańyzdy zań jobasy Parlament qaraýyna engiziledi. Bul týraly Májilis tóraǵasy Erlan Qoshanov málim etti.
— Budan bólek, Prezıdentimiz birqatar qylmystyq jáne ákimshilik quqyqbuzýshylyq boıynsha raqymshylyq jarııalaý jóninde sheshim qabyldady. Sessııa sońyna deıin bul zańdy da qabyldaýǵa tıispiz. Sondyqtan bizge — depýtattarǵa zor jaýapkershilik júktelip otyr. Jańa Konstıtýtsııanyń naqty iske asýyn qamtamasyz etý bizge buıyryp otyrǵany — zor mártebe. Sondyqtan osy tarıhı mıssııany abyroımen atqaraıyq! Prezıdentimiz aıtqandaı, biz Halyq Konstıtýtsııasyn keleshek urpaq aldyndaǵy jaýapkershiligimizdi tereń sezine otyryp qabyldadyq. Endeshe, Ata zańymyz keler urpaqtarymyzben birge jasaı bersin! , — dedi E. Qoshanov Májilistiń jalpy otyrysynda.
Aıta keteıik, 17 naýryzda Memleket basshysy Qasym-Jomart Toqaev Qazaqstan Respýblıkasynyń Konstıtýtsııasyna jáne «2026 jylǵy 15 naýryzda qabyldanǵan Qazaqstan Respýblıkasynyń Konstıtýtsııasyn iske asyrý jónindegi sharalar týraly» Jarlyqqa qol qoıdy.
Sonymen qatar, Prezıdent Konstıtýtsııany qabyldaýǵa arnalǵan saltanatty jıynǵa qatysty.
— Ózderińizge málim, byltyr qylmystyq jaýapkershilikke tartylǵandarǵa raqymshylyq jasaldy. Endi azamattar men memlekettiń qaýipsizdigine qater tóndirmeıtin birqatar qylmystyq jáne ákimshilik quqyqbuzýshylyq boıynsha taǵy da raqymshylyq jarııalaýǵa bolady. Elimizde ákimshilik ister boıynsha raqymshylyq alǵash ret jasalatynyn atap ótkim keledi. Parlament qazirgi sessııanyń sońyna deıin tıisti zań qabyldaýy kerek. Bul — Negizgi zańdaǵy adamgershilik ıdealdary men progressıvti qundylyqtardy qoǵamda ornyqtyratyn mańyzdy qadam, — dedi Qasym-Jomart Toqaev.
