Elde keıbir jobalardy qarjylandyrý kólemi asyra kórsetilgen — aýdıt
ASTANA. KAZINFORM — Memlekettik qoldaý sharalaryn alatyn kásipkerlerge qarsy mindettemeler belgilenýi tıis. Bul týraly kásipkerlik sýbektilerin memlekettik qoldaýdyń tıimdiligine júrgiziletin aýdıt boıynsha esepti jarııalaý kezinde Joǵary aýdıtorlyq palatanyń tóraǵasy Álıhan Smaıylov aıtty.
— Aýdıttiń baǵalaýynsha, jekelegen jobalar boıynsha qarjylandyrý kólemi asyra kórsetilgen. Shyǵys jeńildikpen beriletin kredıttiń maquldanǵan somasyna sáıkes keltirilgen. Quqyqtyq turǵydan qarasaq, talap etiletin jobalyq qujattama bar, kredıtter ótelip jatyr. Alaıda artyq qarajat basqa jobalarǵa baǵyttalýy múmkin edi. Qunyn durys eseptemeý saldarynan tek bir joba boıynsha 20 mlrd teńge nemese qaryz somasynyń 16 paıyzy ıgerilmeı, kúshi joıylǵan. Memlekettik qoldaý kórsetilgen kezeńde keıbir bıznes sýbektileri menshik ıelerine dıvıdendter tólegen jaǵdaılar anyqtaldy. Buǵan shekteý qarastyrylmaǵan. Degenmen memlekettik qoldaý somasynan asatyn mólsherde dıvıdendterdiń tólenýi alańdatady, — dedi Álıhan Smaıylov Májilistiń jalpy otyrysynda.
Onyń aıtýynsha, jobalardy qarjylandyrý kezinde qarajatty túpkilikti alýshylarǵa deıin jetkizýdiń uzaq ýaqytqa sozylýy derekteri bolǵan. Memlekettik qoldaý sharalaryn alýshylar úshin qarsy mindettemeler belgilenýi tıis. Olar oryndalmaǵan jaǵdaıda, qarajat qaıtarylýy qajet. Alaıda mundaı mindettemeler barlyq jerde kózdelmegen.
— Máselen, Pavlodarda is júzinde joq zaýytqa 2,4 mlrd teńgege ınjenerlik jeliler tartylǵan. Jekelegen jaǵdaılarda ońaı oryndalatyn qarsy mindettemeler belgilengen. Mysaly, 37 mlrd teńgege qoldaý kórsetilgen bir joba boıynsha salyqtardyń ósýinen bólek, jumyskerler shtatyn 1 adamǵa ǵana ulǵaıtý talap etilgen. Qarsy mindettemelerdiń oryndalýyn baqylaý kóbine qolma-qol tártipte júrgiziledi. Bul óz kezeginde qarsy mindettemelerdi oryndaý boıynsha derekterdi manıpýlıatsııalaýǵa múmkindik beredi. Operatorlardyń kópshiliginiń qyzmetinde mindettemelerdi saqtamaǵany úshin aıyppul sanktsııalaryn qoldanýda sýbektıvti kózqaras basym, — dedi JAP basshysy.
Buǵan deıin habarlanǵandaı, Joǵary aýdıtorlyq palata bıznesti qoldaý tetikteriniń kemshiligin atady.