Elde kene shaqqan 13 myńnan astam adam dárigerge júgingen
ASTANA. KAZINFORM — Qazaqstanda kenelerdiń belsendi kezeńi bastalǵaly beri medıtsınalyq uıymdarǵa 13 myńnan astam adam qaralǵan.
Osy aralyqta kene entsefalıtiniń 24 jaǵdaıy zerthanalyq jolmen rastaldy. Bul týraly Ortalyq kommýnıkatsııalar qyzmetinde ótken brıfıngte QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova málimdedi.
Onyń aıtýynsha, kene entsefalıti — jaz mezgilinde jıi kezdesetin juqpaly aýrýlardyń biri. Elimizde aýrýdyń tabıǵı oshaqtary Almaty qalasy men onyń mańynda, Almaty, Shyǵys Qazaqstan jáne Jetisý oblystarynda, sondaı-aq Abaı oblysynyń Kókpekti, Aqmola oblysynyń Sandyqtaý jáne Soltústik Qazaqstan oblysynyń Aıyrtaý aýdandarynda ornalasqan.
Elimizde jyl saıyn kene entsefalıtiniń 24-ten 48-ge deıingi jaǵdaıy tirkeledi. Kene shaqqannan keıin jyl saıyn 10–16 myń adam medıtsınalyq kómekke júginedi.
— Bıylǵy 24 jaǵdaıdyń altaýy Shyǵys Qazaqstan oblysynda tirkelgen. Aqmola jáne Soltústik Qazaqstan oblystarynda, sondaı-aq Almaty qalasynda bes jaǵdaı anyqtalǵan. Astana qalasynda úsh jaǵdaı tirkeldi, — dedi ol.
Sarhat Beısenovanyń sózinshe, bıyl kóktemniń erte kelýi men qolaıly aýa raıy kenelerdiń belsendiligin arttyrǵan. Sonyń áserinen kene shaqqan adamdardyń medıtsınalyq uıymdarǵa júginýi kóbeıgen.
Maýsym bastalǵaly beri medıtsınalyq uıymdarǵa 13 myńnan astam adam qaralǵan. Olardyń 45 paıyzy — 14 jasqa deıingi balalar. Eń kóp adam Almaty jáne Shyǵys Qazaqstan oblystarynda, sondaı-aq Almaty qalasynda medıtsınalyq kómekke júgingen.
Epıdemıologııalyq baqylaý aıasynda kene entsefalıtine kúdikpen 454 adam tekserildi. Sonymen qatar adamdardan alynǵan 1 200 kene zertteldi. Onyń 20-synan, ıaǵnı 1,7 paıyzynan kene entsefalıtiniń vırýsy anyqtaldy.
Eske salaıyq, buǵan deıin elordada kene shaqqan jaǵdaıda turǵyndardyń qaı medıtsınalyq uıymdarǵa júgine alatyny týraly jazǵan edik.
