Elde qazaq tilindegi kitaptarǵa suranys artyp keledi
ASTANA. KAZINFORM — Qazaqstanda memlekettik tildegi ádebıetke qyzyǵýshylyq artyp keledi. Keıingi bir jylda kópshilik kitaphanalarynan oqyrmandarǵa 88,9 mln basylym berilse, onyń 53,4 mıllıony nemese 60,1 paıyzy qazaq tilindegi ádebıetter boldy.
Bul úrdis kitaphana qorlarynyń tolyǵýynan da kórinedi. Bir jyl ishinde kópshilik kitaphanalaryna 906,5 myń jańa basylym túsip, sonyń 662,3 myńy qazaq tilindegi kitaptar.
Búginde elimizdiń kópshilik kitaphanalaryndaǵy qazaq tilindegi ádebıetter qory 30,3 mln danaǵa jetti. Bul — jalpy kitaphana qorynyń 41,7 paıyzy.
Oqyrmandar arasynda kórkem ádebıetke degen suranys dástúrli túrde joǵary. Kórkem shyǵarmalarǵa, til bilimi men ádebıettaný salasyndaǵy eńbekterge jalpy berilgen kitaptardyń 57,6 paıyzy nemese 51,3 mln danasy tıesili. Bul baǵyttaǵy basylymdar jańa túsimder arasynda da basymdyqqa ıe. Bir jylda kitaphana qorlary osyndaı mazmundaǵy 577,7 myń basylymmen tolyqty. Bul barlyq jańa túsimniń 63,7 paıyzyn quraıdy.
Kópshilik kitaphanalary oqyrmandarynyń eleýli bóligi balalar men jastar. Olardyń arasynda 15 jasqa deıingi 1,75 mln bala men 1,38 mln jas bar. Eresek oqyrmandardyń sany 2,4 mln adam.
Óńirler boıynsha kitap oqıtyn turǵyndardyń eń joǵary úlesi Pavlodar oblysynda tirkelgen — 47 paıyz. Odan keıingi oryndarda Soltústik Qazaqstan oblysy — 45 paıyz jáne Batys Qazaqstan oblysy — 42 paıyz kórsetkishpen tur.
Bul derekter kópshilik kitaphanalarynyń eldiń mádenı-aǵartýshylyq keńistigindegi orny nyǵaıyp kele jatqanyn ańǵartady. Qazaq tilindegi kitaptarǵa suranystyń artýy, kórkem ádebıettiń keńinen oqylýy jáne balalar men jastardyń belsendiligi elimizde kitap oqý mádenıetin odan ári damytýǵa berik negiz qalyptastyrady.
Aıta ketelik Qazaqstanda kitap salasynyń damýyna kedergi keltirip otyrǵan máseleler týraly jazǵan edik.
