Elde qaıta óńdelgen aýyl sharýashylyǵy ónimderine salyq salý tártibi ózgermeıdi

ASTANA. KAZINFORM — Ulttyq ekonomıka mınıstrligi aýyl sharýashylyǵy shıkizatyn qaıta óńdeý nátıjesinde alynǵan ónim boıynsha esepke jatqyzylatyn QQS-qa qatysty túsinikteme jasady.

Jobalyq keńseniń Salyq Kodeksin engizý máselesi jónindegi otyrysynyń birinde Salyq kodeksiniń 2-tarmaǵynyń 7) tarmaqshasyna jáne 484-babynyń 5-tarmaǵyna sáıkes, aýyl sharýashylyǵy shıkizatyn qaıta óńdeý nátıjesi sanalatyn ónim boıynsha esepke jatqyzylatyn QQS-ty 80 paıyzǵa túzetý máselesi kóterildi.

— Ulttyq ekonomıka mınıstrligi «Agroónerkásiptik keshendi jáne aýyldyq aýmaqtardy damytýdy memlekettik retteý týraly» Qazaqstan Respýblıkasynyń 2005 jylǵy 8 shildedegi № 66 Zańynyń erejelerin eskere otyryp, aýyl sharýashylyǵy shıkizatyn qaıta óńdeý nátıjesi sanalatyn ónim eksporttalǵan jaǵdaıda atalǵan túzetý qoldanylmaıtynyn habarlaıdy. Mysaly, undy eksporttaý kezinde QQS-ty qaıtarý, un óńdelgen ónimge jatatyndyqtan, salyq zańnamasynyń talabyn saqtaı otyryp, jalpyǵa birdeı belgilengen tártippen tolyq kólemde júzege asyrylady. Osylaısha, jańa Salyq kodeksiniń erejesi boıynsha qaıta óńdeý ónimine salyq salýdyń buryn qoldanylǵan tártibi saqtalady, — delingen vedomstvo taratqan aqparatta.

Budan buryn 2026 jylǵy 1 qańtardan bastap Qazaqstanda birqatar dárilik zattardy ımporttaý kezinde qosylǵan qun salyǵynan (QQS) bosatý tártibi qoldanysqa engizilgeni belgili boldy.