Elde qaı ınfektsııalar boıynsha jaǵdaı jaqsardy

ASTANA. KAZINFORM — Qazaqstanda ınfektsııalar boıynsha epıdemıologııalyq jaǵdaı turaqty ma? Osy másele boıynsha Densaýlyq saqtaý mınıstrligi túsinik berdi. 

— 2026 jyldyń 3 aıynda kóptegen juqpaly aýrýlar boıynsha epıdemıologııalyq jaǵdaı turaqty. Respýblıka halqy arasynda júrgizilip jatqan profılaktıkalyq jáne epıdemııaǵa qarsy sharalardyń nátıjesinde 36 juqpaly aýrý boıynsha (oba, tyrysqaq, polıomıelıt, ish súzegi, paratıf, kene vırýstyq entsefalıti) qaýipti jaǵdaı tirkelmedi. Al 31 ınfektsııa boıynsha syrqattanýdyń tómendeýine qol jetkizildi, sonyń arasynda koronavırýs ınfektsııasy — 7,6 ese, kókjótel — 2,9 ese, — dep atalyp mınıstrliktiń Kazinform agenttigine bergen jaýabynda.

Sonymen qatar vedomstvo qazirgi ýaqytta elde qyzylshany juqtyrý jaǵdaılary tirkelip jatqanyn habarlady. Jyl basynan elimizdiń 19 óńirinde qyzylshanyń 5 580 jaǵdaıy tirkeldi.

Naýqastardyń negizgi úlesin ekpe saldyrmaǵan balalar qurady, ıaǵnı aýyrǵan balalar sanynyń 77 paıyzy. Bul rette, 50 paıyzynda ata-analary balalaryna vaktsına salýdan bas tartýyna, 22 paıyzynda medıtsınalyq qarsy kórsetilimderge, sondaı-aq qalǵan 28 paıyzynda ekpe saldyrý jasyna jetpeýine baılanysty vaktsına qoıylmaǵan.

— Qyzylsha Qyrǵyzstan, Reseı, Rýmynııa, Tájikstan, Ýkraına, Grýzııa, Belgııa, Serbııa, Moldova jáne basqa da elderde tirkeldi. Epıdemıologııalyq jaǵdaıdyń asqynýyna birneshe faktor áser etip otyr. Bul turǵyda COVID-19 pandemııasy kezinde balalardyń josparly ekpe merzimin ótkizip alýy men ata-analardyń vaktsınadan bas tartýyn atap ótken jón. Osy eki faktordyń saldarynan ınfektsııanyń taralýy úrdisi joǵarylap, ekpe jasyna jetpegen (1 jasqa deıingi) balalarda qyzylshanyń tirkelýi ózekti másele bola bastady. Ókinishke qaraı, ekpeden bas tartý derekteri jyl saıyn artyp keledi. Qazirgi ýaqytta epıdemıologııalyq jaǵdaıdy turaqtandyrý boıynsha jumystar jalǵasyp jatyr, — delingen DSM aqparatynda.

Aıta keteıik, bıyl aqpan aıynda Qazaqstanda qyzylshanyń taralýy jaǵdaıy qaıta órshigeni habarlandy.