Elde qaı banknotany jıi qoldan jasaıdy
ASTANA. KAZINFORM — Ulttyq bank men ekinshi deńgeıli bankter 2025 jyly 1 122 150 teńgeniń 206 jalǵan aqsha belgisin (203 banknota jáne 3 moneta) anyqtady.
Bul 2024 jylmen (108 jalǵan aqsha belgisi) salystyrǵanda 90,7%-ǵa kóp.
— Qoldan kóp jasalǵany — nomınaly 5 000 teńgelik banknota — 174 dana. Anyqtalǵan jalǵan aqshalardyń jalpy sany boıynsha úlesi — 84,5%. Odan keıingi orynda nomınaly 10 000 teńgelik banknota tur — 22 dana (10,7%). 2 000 teńgelik banknotadan 6 dana (2,9%) anyqtalsa, 20 000 teńgelikten — 1 dana (0,5%), qalǵan 1,4% — monetalar, — delingen Ulttyq bank habarlamasynda.
Ulttyq bank shyn aqshany qoldan jasalǵan banknotalardan ajyratýǵa kómektesetin qarapaıym erejelerdi eske salady.
Jalǵan banknota ádette jaı ǵana ofsettik qaǵazdan jasalady jáne kompıýterlik tehnıka men túrli tústi prınter qoldanylady.
Maıda jazýlar buldyr keledi jáne birneshe ese úlkeıtkende taný múmkin emes.
Shynaıy banknotalardy kózben sholyp qaraǵanda jáne ustap kórgende ońaı anyqtaýǵa bolatyn birqatar qorǵanysh belgisi bar.
— Kúmándi, sonyń ishinde túr-túsi shynaıy aqshaǵa uqsaıtyn banknotalar kezikken jaǵdaıda dereý quqyq qorǵaý organdaryna habar bergen durys, — delingen habarlamada.
Aıta ketelik Ulttyq bank dollar baǵamynyń álsireý sebebin túsindirgen edi.