Elde qaýipti jumystarda júrgen adamdardyń sany belgili boldy
ASTANA. KAZINFORM — 480 myńǵa jýyq adam eńbek jaǵdaılary zııandy jáne qaýipti jumystarda isteıdi. Bul týraly Úkimet otyrysynda Eńbek jáne halyqty áleýmettik qorǵaý mınıstri Asqarbek Ertaev málim etti.
- Búginde Qazaqstanda eńbek jaǵdaılary zııandy jáne qaýipti jumystarda isteıtin jumyskerler sany - 479 myń. Ekonomıka salalary boıynsha zııandy jáne qaýipti jumystarda isteıtin jumyskerlerdiń 61% ónerkásip salasyna eńbek etýde (óńdeýshi ónerkásipte – 122 myń adam, taý-ken ónerkásibinde – 173 myń adam). Elektr energııasy, gazben jabdyqtaý salasynda 40 myń jumysker jumys isteıdi. Bul eńbek jaǵdaılary zııandy jumystarda isteıtin adamdardyń jalpy sanynyń 8,5 paıyzyn qurady, - dedi A. Ertaev.
Onyń aıtýynsha, óńirler boıynsha zııandy jumystarda isteıtin jumysshylardyń basym bóligi Qaraǵandy oblysynda – 84 myń adam, Pavlodar oblysynda – 57 myń, Mańǵystaý oblysynda – 43 myń jáne Shyǵys Qazaqstan oblysynda – 43 myń adam.
Budan buryn habarlanǵandaı, Qazaqstanda jumysshylardy sútpen jáne emdik-profılaktıkalyq taǵammen qamtamasyz etý qaǵıdalaryna ózgerister engiziledi.
