Elde qaýipti jáne aýyr salmaqty júkterdi tasymaldaý qaǵıdalaryna ózgerister engizildi
ASTANA. KAZINFORM — Kólik mınıstrligi avtomobıl kóligimen qaýipti, iri gabarıtti jáne aýyr salmaqty júkterdi tasymaldaýdy retteýge baǵyttalǵan buıryq qabyldady.
Vedomstvonyń baspasóz qyzmeti atap ótkendeı, qujat tehnıkalyq sıpatqa ıe jáne zańnamany EAEO talaptaryna, atap aıtqanda kólik quraldarynyń ruqsat etilgen salmaqtaryna, ostik júktemelerine jáne gabarıtterine sáıkestendirýge, sondaı-aq múshe memleketter arasyndaǵy kólik logıstıkasyn damytýǵa baǵyttalǵan.
Buıryq aıasynda kelesi baǵyttardy retteıtin birqatar qoldanystaǵy normatıvtik quqyqtyq aktige ózgerister men tolyqtyrýlar engizildi:
- avtomobıl kóligimen qaýipti júkterdi tasymaldaý;
- iri gabarıtti jáne aýyr salmaqty júkterdi tasymaldaýdy uıymdastyrý;
- avtokólik quraldarynyń ruqsat etilgen parametrleri.
Qaýipti júkterdi tasymaldaý
DOPOG talaptaryna sáıkes «E» sanatyndaǵy tonnelder arqyly ótý tártibi qosymsha retteldi. Mundaı tonnelder arqyly qaýipti júkterdi tasymaldaýǵa shekteýler belgilenip, sondaı-aq tasymaldaýshylarǵa balama baǵyttardy aldyn ala aıqyndaý mindeti bekitildi.
Іri gabarıtti jáne aýyr salmaqty tasymaldardy júzege asyrý kezinde salmaq-gabarıt parametrlerin baqylaý
Ruqsat etilgen salmaq jáne gabarıt parametrleri asqan jaǵdaıda qozǵalysty jalǵastyrý sharttary naqtylandy. Onyń ishinde naqty júrip ótken jáne alda júretin baǵyt aýmaqtary úshin alymdardy tóleý tártibi belgilendi.
Memlekettik qyzmetter
Arnaıy ruqsattardy berý boıynsha memlekettik qyzmet kórsetý tetigi jańartyldy — qyzmet ótinish berýshiniń tirkelgen jeri boıynsha «elektrondyq úkimet» portaly arqyly kórsetiledi.
Sondaı-aq ruqsattardyń qoldanylý merzimderi qaıta qaraldy:
- 5 saparǵa deıin — 45 kúntizbelik kúnge deıin;
- 6-dan 10 saparǵa deıin — 90 kúnge deıin;
- odan kóp sapar bolǵan jaǵdaıda — 6 aıǵa deıin.
Kólik quraldarynyń ruqsat etilgen parametrleri
Oster arasyndaǵy qashyqtyq pen dóńgelek túrlerin eskere otyryp, ostik júkteme normalary jańartyldy. Jaqyn ornalasqan oster toby uǵymy engizilip, júktemeni bólý tártibi belgilendi. Dóńgelekterdiń túrine baılanysty ostik júktemelerdiń ruqsat etilgen deńgeıi burynǵy talaptarmen salystyrǵanda ulǵaıtyldy, bul oske túsetin júktemesi joǵary júkterdi tasymaldaýǵa múmkindik beredi.
— Qabyldanǵan ózgerister jol qozǵalysy qaýipsizdigin arttyrýǵa, avtomobıl joldaryn saqtaýǵa jáne tasymaldaý qyzmetin retteýdi jetildirýge baǵyttalǵan. Buıryq 2026 jylǵy 25 sáýirden bastap kúshine enedi, — delingen habarlamada.
Osyǵan deıin kólik salasynda kórsetilgen qyzmet kólemi 2,9 trln teńgege jetkenin jazǵanbyz.
