Elde kásipkerlerdi tekserý tártibin ózgertý usynyldy

ASTANA. KAZINFORM – Kásipkerlik salasynda baqylaýshy memlekettik organdardyń jumysyn baǵalaý kórsetkishterin ózgertý kerek. Bul týraly Quryltaı depýtaty Bekjan Aıtqulov málim etti.

SQO-da kásipkerlerdiń salyq bereshegi 6 mlrd teńgege jýyq
Foto: Kazinform/JI

- Memleket basshysy Qasym-Jomart Toqaev Qazaqstan halqyna Joldaýynda «Aldyńǵy moratorııdiń barlyq oń jáne teris tustaryn eskere otyryp, 2027 jylǵy 1 qańtardan bastap kezekti úsh jyldyq moratorıı engizýdiń oryndylyǵyn Quryltaı depýtattaryna Úkimetpen birlesip talqylaýdy usynamyn» dedi. Bastama kásipkerdiń alańsyz jumys atqaryp, qarqyndy damýyna yqpal eteri anyq. Biraq ár kásipker kezekti moratorııdi kútpeı, adal jumys atqarý ádetin qalyptastyrýy kerek. Bizdiń ortaq maqsatymyz – memleket pen bıznes arasyndaǵy ádil, túsinikti, ashyq ári tıimdi erejelerdi qalyptastyrý. Ózara senim men jaýapkershilikke negizdelgen júıe qurylǵanda ǵana turaqty ekonomıkalyq ósimge qol jetkizip, qoǵamdyq qaýipsizdikti qamtamasyz etýge bolady. Kásipkerlikti el ekonomıkasynyń basty draıveri deımiz. Alaıda kásipkerlerdi qyzmet salasyna qaraı 20-dan astam memlekettik organ tekseredi eken. Sońǵy 3 jylda 155 899 tekseris júrgizilip, olardyń nátıjesinde mıllıondaǵan aıyppul salynǵan. Al baqylaýshy organdardyń jurtshylyqqa jetistik retinde usynatyn negizgi kórsetkishteri — júrgizilgen tekserister men salynǵan aıyppuldardyń sany. Bul oılandyratyn úrdis, - dedi Bekjan Aıtqulov Premer-Mınıstrdiń birinshi orynbasary Nurlybek Nálibaevtiń atyna joldaǵan depýtattyq saýalynda.

Osy oraıda ol orta jáne iri bıznes sýbektilerin tekserý men memlekettik baqylaý júrgizýdiń tıimdiligin taldap, baqylaýshy organdardyń qyzmetin baǵalaýdy qaıta qaraýdy usyndy.

- Osyǵan baılanysty ónerkásip kásiporyndarynda jabdyqtardy jańartýǵa, zııandy shyǵaryndylar kólemin azaıtýǵa, apattardyń aldyn alýǵa jáne jumyskerlerdiń ómiri men densaýlyǵyn qorǵaýǵa tikeleı qatysty sharalardy qarastyrýdy suraımyn. Birinshiden, kásipkerlikti tekserý, memlekettik baqylaý men qadaǵalaýdy júzege asyrý tártibin retteıtin zańnamalyq aktilerdi qaıta qarap, olarǵa ózgerister men tolyqtyrýlar engizý kerek. Ekinshiden, baqylaýshy memlekettik organdardyń jumysyn baǵalaý kórsetkishterin ózgertý mańyzdy. Aıyppuldar somasy, hattamalar sany ınspektsııalardyń jumysyn baǵalaý ólshemi bolmaýy kerek. Úshinshiden, kásipkerler men memlekettik ınspektorlar arasynda erikti seriktestik modelin engizý mańyzdy. Kásiporyn óz bastamasymen memlekettik organdy aýdıt júrgizýge jáne keńes alýǵa shaqyra alatyn quqyqtyq tetik kerek. Kemshilikter anyqtalǵan jaǵdaıda, birden jazalaý sharalaryn qoldanbaı, olardy is júzinde túzetý úshin 3–5 jylǵa arnalǵan birlesken jol kartasyn bekitý tıimdi, - dedi depýtat.

Aıta keteıik, Qazaqstan halqyna Joldaýyn jarııalaý kezinde Prezıdent Qasym-Jomart Toqaev kásipkerlikke kedergi keltirmeý máseleleri jóninde málimdedi.