Elde kartop, qyryqqabat jáne pııaz baǵasy arzandady
ASTANA. KAZINFORM – 12 tamyzdaǵy jaǵdaı boıynsha, esepti aptada Qazaqstanda áleýmettik mańyzy bar azyq-túlik taýarlarynyń birqatarynyń baǵasy tómendedi.
— Apta ishinde kartoptyń baǵasy (-4,2%), qyryqqabat (-1,2%), alma (-1,1%), pııaz ben sábiz (-1%) arzandady. Sondaı-aq qatty jáne jartylaı qatty irimshiktiń baǵasy (-0,3%), maılylyǵy 5-9% súzbe jáne tuz (-0,2%), birinshi surypty bıdaı uny men qaımaq (-0,1%) tómendedi, — delingen Ulttyq statıstıka habarlamasynda.
Birinshi surypty unnan pisirilgen bıdaı nany, makaron ónimderi, súıekti sıyr eti, súıeksiz sıyr eti, jylqy eti, maılylyǵy 2,2%-dan 6%-ǵa deıingi pasterlengen, ýltrapasterlengen jáne sterıldengen sút, jumyrtqa jáne sary maıdyń baǵasy esepti aptada ózgerissiz qaldy.
— Óńirlik bóliniste elimizdiń birqatar qalasynda deflıatsııalyq dınamıka baıqaldy. Áleýmettik mańyzy bar azyq-túlik taýarlarynyń jalpy baǵasy bir apta ishinde Taldyqorǵanda (-0,7%), Aqtaý men Jezqazǵanda (árqaısysy -0,4%), Petropavlda (-0,3%), Astanada (-0,2%), Qaraǵandy, Qostanaı, Oral, Óskemen jáne Pavlodar qalalarynda (-0,1%) tómendedi. Almaty, Túrkistan, Aqtóbe, Semeı jáne Taraz qalalarynda baǵa aldyńǵy apta deńgeıinde saqtaldy, — delingen habarlamada.
Respýblıka boıynsha kartoptyń ortasha baǵasy kelisine 259 teńge, al eń tómen baǵa Pavlodarda tirkeldi — kelisine 191 teńge.
Qyryqqabattyń respýblıka boıynsha ortasha baǵasy kılogramyna 189 teńge boldy. Eń tómen baǵa Túrkistanda — 142 teńge, Tarazda — 152 teńge deńgeıinde tirkeldi.
Almanyń ortasha baǵasy kelisine 797 teńge. Eń tómen baǵa Shymkentte tirkeldi — 639 teńge.
Et ónimderiniń ishinde respýblıka boıynsha súıekti sıyr etiniń ortasha baǵasy kelisine 3 779 teńgeni, taýyq etiniń baǵasy 1 736 teńge.
Aıta ketelik Qazaqstanda azyq-túlik óndirisi 14,7%-ǵa artty.
