Elde qansha traktor bar
ASTANA. KAZINFORM – Bıyl elde aýyl sharýashylyǵy tehnıkasy parkiniń jańarý deńgeıi 8% bolady. Bul týraly Úkimet otyrysynda Aýyl sharýashylyǵy vıtse-mınıstri Azat Sultanov málim etti.
- Egis naýqanyn sapaly júrgizýde aýyl sharýashylyǵy tehnıkasynyń daıyndyǵy men dızel otynymen qamtamasyz etý mańyzdy. Qazirgi kezde tehnıka egis jumystaryn júrgizýge tolyq daıyn. Jalpy aýyl sharýashylyǵy qurylymdarynda: 133,9 myń traktor, 5,6 myńǵa jýyq joǵary ónimdi egis kesheni, 71,4 myń sepkish, 188,5 myń topyraq óńdeý quraly bar. Odan bólek tehnıkany jóndeıtin 70 servıstik ortalyq jumys isteıdi. Memlekettik qoldaý sharalarynyń nátıjesinde, 2025 jyly aýyl sharýashylyǵy tehnıkasy parkiniń jańarý deńgeıi 6,5%-ǵa jetti. Osy jylǵa josparlanǵan kórsetkish - 8%, - dedi A.Sultanov.
Onyń aıtýynsha, aýyl sharýashylyǵy tehnıkasy parkiniń tozý deńgeıi 10%-ǵa tómendedi. Osy oraıda memlekettik qoldaý sharalary eń aldymen otandyq óndirýshilerdi qoldaýǵa baǵyttalǵan. Mysaly, otandyq tehnıkany satyp alý kezinde sýbsıdııa 30%-dy qurasa, ımporttyq tehnıkaǵa
15-25% kóleminde beriledi. Sondaı-aq jeńildetilgen lızıng baǵdarlamasynda otandyq tehnıkaǵa basymdyq beriledi.
- Osy sharalar otandyq mashına jasaý salasynyń damýyna oń áserin tıgizdi - bir jyldyń ishinde aýyl sharýashylyǵy tehnıkasyn óndirý kólemi 22%-ǵa artty. Bıyl óndiris kólemin 9,9 myń tehnıkaǵa jetkizý, ıaǵnı taǵy 6%-ǵa ulǵaıtý josparlanǵan. Budan bólek, Qazaqstan naryǵyna CLAAS, John Deere, Amazone sııaqty álemdik óndirýshiler men olardyń seriktesteri kelip jatyr. Aýyl sharýashylyǵy tehnıkasy parkiniń jańarýy egis jumystaryn ońtaıly agrotehnıkalyq merzimderde joǵary ónimdilikpen júrgizýge, sondaı-aq egis sapasy men birkelkiligin arttyrýǵa múmkindik beredi, - dedi vıtse-mınıstr.
Budan buryn habarlanǵandaı, Aýyl sharýashylyǵy vıtse-mınıstri Azat Sultanov shegirtke zııankesterine qarsy hımııalyq óńdeý jumystary kórshi eldermen birlese júzege asatynyn aıtty.
