Elde qansha mal men tól bar

ASTANA. KAZINFORM — Mal sharýashylyǵy salasynda basym baǵyttar boıynsha nátıje joǵary jáne turaqty ósim bar. Aýyl sharýashylyǵy janýarlarynyń sany da, óndirilgen ónim kólemi de oń qarqynǵa ıe. 

Atap aıtqanda, iri qara mal sany 2,7%-ǵa artyp, 8,3 mln-ǵa jetti. Bul rette tól sany 2,8 mln buzaý boldy, ótken jyldyń sáıkes kezeńimen salystyrǵanda 17,8%-ǵa ósti. Jylqy sany 6,9%-ǵa kóbeıip, 4,4 mln basqa jetti, tól sany — 1 mln qulyn (ósim 8,8%). Túıe sany 6,3%-ǵa artyp, 300 myń boldy, al tól sany 53,8 myń botaǵa jetip, 5,9%-ǵa ósti.

Qus sany 8,8%-ǵa artyp, 48,5 mln basqa jetti. Qoı sany ótken jylǵy deńgeıde saqtalyp, 19,6 mln boldy, qozy sany 7,7 mln jetip, 5%-ǵa ósti.

— Esepti kezeńde el boıynsha ettiń barlyq túrinen 1 021,6 myń tonna ónim óndirildi, bul 2024 jylǵy kórsetkishten 3%-ǵa joǵary. Atap aıtqanda, sıyr eti — 358,8 myń tonna (2024 jyly — 351,4 myń tonna), qoı eti — 111,8 myń tonna (109,1 myń tonna), jylqy eti — 146,8 myń tonna (140 myń tonna), qus eti — 337,1 myń tonna (326,3 myń tonna) jáne basqa da ónimder óndirildi, — delingen AShM habarlamasynda.

Mal sharýashylyǵynyń ózge de ónimderi boıynsha jetistik bar. Sút óndirisiniń kólemi 3 491 myń tonna, 2024 jyldyń sáıkes kezeńimen salystyrǵanda 5%-ǵa artty (3 324 myń tonna). Jumyrtqa óndirisi 4 156,7 mln danaǵa jetip, ótken jylmen salystyrǵanda 1,5%-ǵa ósti (4 097 mln dana).

Mal sharýashylyǵynyń jalpy óniminiń naqty kólem ındeksi 103,5% boldy, al óndirilgen ónimniń aqshalaı kólemi 3,3 trln teńgege jetti. Bul turaqty damýdyń jáne el ekonomıkasyna úlestiń jarqyn kórsetkishi. 

Aıta ketelik elde kanadalyq orman bızondary kóbeıip jatqany týraly jazǵan edik.