Elde qansha lıftini aýystyrý kerek
ASTANA. KAZINFORM — Keıingi jyldary Qazaqstanda lıft qaýipsizdigi máselesi asa ótkir bolyp otyr, alaıda júıeli sheshimder qabyldanǵan joq. Bul týraly senator Bekbol Orynbasarov depýtattyq saýal joldady.
Senatordyń aıtýynsha, ol osyǵan deıin lıftiler men kótergish mehanızmderdiń qaýipsizdigi máselelerin kótergen bolatyn. Alaıda memlekettik organdar atústi jaýaptaryn joldap, naqty sharalar oryndalmaǵan. Ol bul taqyrypqa qaıta oralýǵa májbúr ekenin atap ótti. Óıtkeni, nemquraıly kózqaras qaıǵyly jaǵdaıǵa ákeledi.
— Qazaqstandaǵy lıfterdi paıdalaný jaǵdaıy nasharlap keledi. Jergilikti atqarýshy organdardyń tolyq kadrlyq jetkiliksizdigi, lıfterge baqylaýdy formaldy etýde: ákimdikterde shtat ta, mamandar da, tehnıkalyq baza da joq. Mysaly, Astanada turǵyn úı ınspektsııasynda 10 430 lıftige eki adam ǵana baqylaý júrgizedi jáne bir ýaqytta gaz ballondaryna da jaýap beredi, al oblystardaǵy ınspektorlar lıftilerdiń qaýipsizdik mehanızmderi jóninde tipti mınımaldy bilimge de ıe emes. 2013 jyly lıftige baqylaýdy jergilikti atqarýshy organdarǵa berý — bul óte qate sheshim boldy. Sol kezde Tótenshe jaǵdaılar mınıstrliginiń kásibı baqylaý fýnktsııalaryn ońtaılandyrý degen jeleýmen ákimdikterge berdi. Jergilikti deńgeıde bul fýnktsııalar jaı ǵana basqa qyzmettermen sińisip ketken, ıaǵnı shtattar qysqartyldy, jaýapkershilik múldem joıyldy, — dedi Bekbol Orynbasarov Senattyń jalpy otyrysynda.
Sonymen qatar depýtat 2014 jyly lıtsenzııa joıylǵannan keıin, lıftige qyzmet kórsetý naryǵyn jabdyǵy da, biliktiligi men ruqsaty da joq kompanııalar basyp qalǵanyn atap ótti. Memlekettik satyp alýlarda jeńiske jetken uıymdardyń jartysynan kóbi lıftimen jumys isteýge quqyly emes, bul salany is júzinde «sur salaǵa» aınaldyrdy.
— Eń mańyzdy másele — lıft parkiniń eskirýi. Lıftilerdi normatıvti paıdalaný merzimi 25 jyl, odan keıin keıin ony jóndeý múmkin emes, tek aýystyrý qajet. Búginde Qazaqstanda 4 myńnan astam lıft aýystyrýdy qajet etedi. Al Erazııalyq ekonomıkalyq komıssııanyń derekteri boıynsha shamamen 7 myń lıft paıdalaný merzimin aıaqtaǵan. Bul óz kezeginde árbir onynshy lıft yqtımal qaýip tóndiretinin bildiredi, — dedi senator.
Onyń paıymynsha, kóppáterli turǵyn úı obektilerindegi lıftilerge memlekettik baqylaýdy ákimdikterden Tótenshe jaǵdaılar mınıstrliginiń Ónerkásiptik qaýipsizdik komıtetine qaıtarý qajet.
— Lıftilerdi qaýipti tehnıkalyq mehanızm retinde tanyp, qatań baqylaý sharalaryn qoldaný jáne eskirgen lıftilerdi tolyq aýystyrýǵa arnalǵan memlekettik baǵdarlamany iske qosý, ókilettilikterdi qaıta qaraý jáne jańa ári tıimdi algorıtm jasaý úshin vedomstvoaralyq komıssııa qurýdy usynamyz. Sonymen qatar, lıft salasynda qaýipsizdikti arttyrý úshin memlekettik baqylaý men qadaǵalaý organdarynyń ókilettilikterin aýdıtten ótkizý kerek», — dedi senator.
Buǵan deıin habarlanǵandaı, qazirgi kezde eldegi lıftilerdiń 40 paıyzdan astamy tozyǵy jetken, olardyń paıdalaný merzimi 25-30 jylǵa deıin sozylǵan.