Elde qansha kamera jasandy ıntellekt júıesimen jabdyqtalǵan

ASTANA. KAZINFORM — Іshki ister organdarynyń qylmyspen kúres jáne qoǵamdyq tártipti qamtamasyz etýde jasandy ıntellekt qanshalyqty aýqymdy engizilip jatyr? Bul suraqqa Іshki ister mınıstrliginiń baspasóz qyzmeti jaýap berdi.

— Іshki ister organdaryna quqyqtyq tártipti nyǵaıtýǵa, qoǵamdyq qaýipsizdikti qamtamasyz etýge, sondaı-aq azamattardyń quqyqtary men bostandyqtaryn qorǵaýǵa baǵyttalǵan jasandy ıntellekt tehnologııalaryn qoldanatyn tsıfrlyq jobalar engizilip jatyr. Atap aıtqanda, eldi mekenderdi beınebaqylaý kameralarymen jabdyqtaý jumystary jalǵasyp jatyr (1,5 mln kamera esepke alyndy, onyń ishinde 475 myń kamera jedel basqarý ortalyǵyna shyǵarylyp, iske qosylǵan). Jol qozǵalysy erejesin buzý jaǵdaıyn avtomatty túrde tirkeý júıeleri arqyly 7 mıllıonnan astam quqyq buzý deregi anyqtalyp, bıýdjetke 78 mlrd teńge óndirildi, — delingen mınıstrliktiń Kazinform agenttigine bergen jaýabynda.

Vedomstvo aqparatyna qaraǵanda, elimiz boıynsha shamamen 21 myń beınekamera jasandy ıntellektimen jabdyqtalǵan. Olar kelesi fýnktsııalardy oryndaı alady:

• bet-álpetti taný,

• memlekettik tirkeý nómirin taný,

• adamdardyń shoǵyrlanýyn anyqtaý,

• qalyp qoıǵan zattardy taný,

• tyıym salynǵan aýmaqty kesip ótý faktisin anyqtaý jáne t. b.

— Bul kameralar terrorıstik turǵydan osal nysandarda ornatylǵan (temirjol vokzaldary, áýejaılar, qonaqúıler, kósheler, jol aıyryqtary, saýda-oıyn-saýyq ortalyqtary jáne t. b.). Memleket basshysynyń tapsyrmasyna sáıkes, 2025 jylǵy 23 maýsymnan bastap ІІM «EgovMobile» mobıldi qosymshasyna, sondaı-aq ekinshi deńgeıdegi bankterdiń (Kaspi.kz, Halyk Bank) qosymshalaryna jańa — «Zań men Tártip» servısin engizdi, — dep atalyp ótken ІІM aqparatynda.

— Bul qyzmet arqyly azamattar kelesi jaǵdaılar boıynsha polıtsııaǵa jedel túrde habarlama jibere alady:

• jol-kólik oqıǵasy,

• jol erejesin buzý,

• turmystyq zorlyq-zombylyq,

• oqys oqıǵa,

• balaǵa qatysty oqıǵa,

• polıtsııa qyzmetkeriniń áreketine shaǵym jáne t. b.

Atalǵan servısti qoldaný aıasyn keńeıtý maqsatynda 2025 jylǵy 24 qyrkúıekten bastap bul qyzmet Eýrazııalyq banktiń qosymshasynda iske qosyldy. Qazirgi kezde mınıstrlik qyzmetkerleri tehnıkalyq mamandarmen birlesip, mobıldi qosymshanyń fýnktsıonalyn jetildirý, sondaı-aq kelip túsken ótinishterdiń oryndalýyn baqylaý tetikterin qarastyrý, kadrlyq jáne qarjylyq úderisterdi tsıfrlandyrý aıasynda JI-assıstentterdi engizý baǵytynda da naqty qadamdar jasap jatyr. Bul óz kezeginde kadrlardy irikteýde protsestiń ashyqtyǵyn, tıimdiligin jáne senimdiligin qamtamasyz etetin bolady.

Buǵan deıin jyl basynan beri teris sebeptermen 80-nen astam polıtseı qyzmetinen shyǵarylǵanyn jazǵan edik.