Elde qansha ekinshi dúnıejúzilik soǵys ardageri bar

ASTANA. KAZINFORM — Elimizde ekinshi dúnıejúzilik soǵys ardagerlerine, áleýmettik tólemderine qaramastan, aı saıyn memlekettik áleýmettik járdemaqy tólenedi. Bul týraly Eńbek jáne halyqty áleýmettik qorǵaý vıtse-mınıstri Oljas Anafın málim etti. 

— 2025 jylǵy 1 sáýirdegi jaǵdaı boıynsha Qazaqstanda ekinshi dúnıejúzilik soǵysynyń 111 ardageri, sondaı-aq Uly Jeńiske úles qosqan basqa sanattaǵy 41 468 ardager turady, — dedi Oljas Anafın elordada ótken ardagerler keńesiniń respýblıkalyq plenýmynda.

Olardyń ishinde:

— Kámeletke tolmaǵan kontslager tutqyndary — 134 adam;

— Qorshaýdaǵy Lenıngrad turǵyndary — 66 adam;

— Ekinshi dúnıejúzilik soǵysta qaza tapqan jaýyngerlerdiń jesirleri — 2 adam;

— Ekinshi dúnıejúzilik soǵysta múgedek bolyp, ómirden ótken ardagerlerdiń jubaılary — 1667 adam;

— Tyl ardagerleri — 39 588 adam;

— Basqa sanatta — 11 adam.

— Ekinshi dúnıejúzilik soǵys ardagerlerine, áleýmettik tólemderine qaramastan, aı saıyn memlekettik áleýmettik járdemaqy tólenedi. Onyń mólsheri — 16 aılyq eseptik kórsetkish kóleminde, ıaǵnı 62 912 teńge, — deıdi vıtse-mınıstr.

Aıta ketsek, bıyl Uly Jeńistiń 80 jyldyǵyna oraı el aýmaǵynda eki myńdaı is-shara ótedi.

Uly Jeńistiń 80 jyldyǵyna oraı elordada ótetin áskerı sherý barlyq respýblıkalyq telearna men LED ekrandardan tikeleı kórsetiledi. 

Búgin elordada «Ardagerler uıymy» respýblıkalyq qoǵamdyq birlestigi ortalyq keńesiniń III plenýmy ótti.