Elde qansha buqaralyq aqparat quraly tirkelgen
ASTANA. KAZINFORM – Mádenıet jáne aqparat mınıstrliginiń málimetinshe respýblıkada barlyǵy 4 871 buqaralyq aqparat quraly tirkelgen.
Onyń ishinde 3 002 merzimdi basylym (gazet, jýrnal), 236 telearna, 98 radıo, 1 231 aqparat agenttigi men onlaın-basylym bar. 2025 jyldyń I jartyjyldyǵynda BAQ reestri jańartylyp, el aýmaǵynda 140 BAQ qyzmetin toqtatyp (59 gazet, 62 jýrnal, 19 ınternet-basylym), tirkeýden shyǵaryldy.
Jyl basynan beri ınternet jelisinen 74 130 zańǵa qaıshy materıal anyqtalyp, olardyń 36 667-i joıylǵan. Onlaın platformalardan 49 896 materıal tabylyp, onyń 12 433-i joıyldy.
«Evrazııa» arnasy reseılik «Pervyı kanal» arnasymen birlesip, Qazaqstanda «Allıgator» atty 8 serııaly kórkem serıal túsirdi. Búginde «Qazaqstan» arnasy túrkııalyq «Kanal D» arnasymen birge «Qaıta oralǵan Úmit» atty 100 serııaly telehıkaıany jaryqqa shyǵarmaq. «24KZ» arnasy Qytaıdyń CCTV‑4 arnasymen «Ortalyq Azııa – Qytaı» sammıti aıasynda Qazaqstan jaıly «Ortaq úı» («Obşıı dom») atty derekti fılmniń premerasyn ótkizdi. «Habar» arnasynda «Uly dala men Aspan asty eli: kórshiler, seriktester, dostar» atty derekti fılm kórsetildi.
Halyqaralyq yntymaqtastyq Euronews-pen seriktestik aıasynda «Modern Nomads» televızııalyq baǵdarlamasynyń 12, «East West Connect» 6, «Voices from Central Asia» 6 shyǵarylymy, «Focus» 3 reportajy ázirlendi.
Sonymen birge, 2025 jyldyń naýryz-maýsym aılarynda Euronews Academy bilim berý jobasy boıynsha Qazaqstanda jýrnalıstıka jáne medıamenedjment baǵyttarynda 4 kásibı kýrs uıymdastyryldy.
«Sur tabaqshalar» naýqany aıasynda sheteldik spýtnık qurylǵylaryna balama retinde otandyq spýtnık apparattaryn satyp alýǵa yntalandyrý maqsatynda sýbsıdııalaý baǵdarlamasy iske qosyldy. Almaty, Jambyl, Túrkistan oblystarynda 300-den astam qurylǵy satyp alý quny sýbsıdııalandy. Jaqyn arada shekaralas aımaqtarda turǵyndar 3 000-nan astam apparat paıdalanady dep josparlanyp otyr.
Aıta ketelik BAQ qyzmetkerlerine Prezıdent atynan baspana sertıfıkattary tabystalǵan edi.