Elde qansha avtomektep jumys istep tur
ASTANA. KAZINFORM – Keıbir avtomektepterdegi oqytý sapasy tómendep barady. Bul týraly Májilistiń jalpy otyrysynda depýtat Nurtaı Sabılıanov málim etti.
- Zań jobasy júrgizýshilerdi daıarlaıtyn mektepterdiń qyzmetin retteýdi kózdeıdi. Qazirgi ýaqytta elimizde 727 avtomektep bar. Olar «habarlamalyq» tártip boıynsha jumys isteıdi, ıaǵnı avtomektepke ruqsat alýdyń qajeti joq. Egov portaly arqyly qyzmettiń bastalǵany týraly habarlama jiberý jetkilikti. Memleket olardy aldyn ala teksermeıdi. Baqylaý júrgizilmeıdi. Bul keıbir avtomektepterdegi oqytý sapasynyń tómendeýine ákelip soǵyp otyr. Sondyqtan avtomektepterdiń qyzmetine ruqsat berý tártibi engiziledi. Mundaı ruqsattardy alý úshin oqý uıymdarynyń jyljymaıtyn múlkin paıdalaný quqyǵyn rastaıtyn, oqý-materıaldyq bazasyn aıqyndaıtyn qujattardyń, daıarlyq baǵdarlamalarynyń bolýy, sondaı-aq oqytýshylar men óndiristik oqytý sheberleriniń tizimderin usyný talap etiledi, - dedi N. Sabılıanov.
Sonymen qatar, avtomektepterdiń tizilimi (reestr) qurylady, ony Іshki ister mınıstrligi júrgizedi. Avtomektepterdiń qyzmeti zań talaptaryna sáıkes kelmegen jaǵdaıda, olar tizilimge engizilmeıdi jáne jumys isteýge ruqsat etilmeıdi. Bul óz kezeginde baqylaýdy kúsheıtýge, avtomektepterdegi oqý sapasyn arttyrýǵa oń áser etedi jáne adal básekelestikti qalyptastyrýǵa yqpal etedi.
Budan buryn habarlanǵandaı, búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine jol qaýipsizdigin tsıfrlandyrý jáne júrgizýshilerdi daıarlaý salasyndaǵy kásipkerlik qyzmet máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
