Elde qansha áýe kóligi tirkelgen
ASTANA. KAZINFORM — «Qazaqstannyń avıatsııalyq ákimshiliginiń» bas atqarýshy dırektory Maıkl Denıel azamattyq avıatsııa sýbektilerin tekserýge qatysty túsinik berdi.
— Qazaqstanda áýe kemelerin paıdalanatyn 104 operator jumys istep tur. Búginde Qazaqstan Respýblıkasynyń memlekettik áýe kóligi tiziliminde 973 áýe kemesi tirkelgen. Elde 25 áýejaı, áýe kemelerine tehnıkalyq qyzmet kórsetý jáne jóndeý jóninde 28 uıym, 21 avıatsııalyq oqý ortalyǵy sertıfıkattalǵan, — dedi Maıkl Denıel Úkimet otyrysynda.
Onyń aıtýynsha, «Qazaqstannyń avıatsııalyq ákimshiligi» AQ 2025 jyly men 2026 jyldyń birinshi toqsanynda azamattyq avıatsııa salasy sýbektilerine 1202 tekserý júrgizip, 1234 sertıfıkat pen kýálik berdi.
— Osy tekseristerdiń nátıjesinde jeti áýe kompanııasyna qatysty sertıfıkattardy ýaqytsha toqtatý nemese qaıtaryp alý jóninde sheshim qabyldandy. Al tórt avıatsııalyq oqý ortalyǵynyń jumysy toqtatyldy. Sonymen qatar 8 aerodromǵa qatysty 15 shekteý engizildi, — dedi ol.
Buǵan deıin qazaqstandyq áýe kompanııalaryna Taıaý Shyǵystaǵy jaǵdaı qalaı áser etip jatqanyn jazǵan edik.
2025 jyly qazaqstandyq áýe kompanııalar 15 mln jolaýshy tasymaldady. Bıylǵy alǵashqy 4 aıda jolaýshylar sany 4 mln-nan asty.
