Elde qansha alma baǵy bar

ASTANA. KAZINFORM — Qazaqstanda 29 myń gektarǵa jýyq alma baǵy bar. Bul týraly AShM baspasóz qyzmeti habarlady. 

Qazaqstandaǵy alma baqtarynyń jalpy alańy shamamen 29 myń gektar.

Negizinen Almaty, Túrkistan, Jambyl jáne Jetisý oblystarynda ornalasqan. Tek Almaty jáne Jetisý oblystarynyń ózinde alma baqtary 2,4 myń gektardan astam aýmaqty alyp jatyr, munda 416 myńnan artyq alma aǵashy ósiriledi.

— Baý-baqsha sharýashylyǵy agroónerkásiptik keshenniń mańyzdy baǵyttarynyń biri. Memlekettik qoldaý sharalarynyń arqasynda 2014 jyldan bastap fermerler baq otyrǵyzý men ıntensıvti tehnologııalardy engizýge arnalǵan ınvestıtsııalyq sýbsıdııalar alady. Sonyń nátıjesinde alma óndirý kólemi 43%-ǵa, al ónimdilik 27%-ǵa artty, — dedi Erbol Tasjúrekov.

Vıtse-mınıstr qazaqstandyq baqtyń sımvoly sanalatyn aport týraly aıta kele, onyń tek alma sorty emes, eldiń mádenı murasynyń bir bóligi ekenine de toqtaldy.

— Aportty ulttyq brend retinde qaıta jańǵyrtý baǵytynda naqty sharalar qabyldanyp jatyr. Aýmaǵyn keńeıtý, agrotehnıkany jetildirý jáne bul sortty halyqaralyq deńgeıde tanymal etý josparlanǵan. Qazir Sıvers almasynyń kóshetterin ósiretin pıtomnık quryldy, kóshetter daıyndaý men jańa baqtar otyrǵyzý jumystary júrgizilýde. 2027 jylǵa deıin 110 gektar aport baǵy otyrǵyzylmaq. Qazaq jemis jáne kókónis sharýashylyǵy ǵylymı-zertteý ınstıtýtynyń ǵalymdary selektsııalyq jáne agrotehnıkalyq baǵdarlamalardy belsendi damytyp keledi. 85 jyldyq selektsııalyq jumys nátıjesinde Qazaqstanda shamamen 400 sort pen býdandardan turatyn kollektsııa qalyptasqan, onyń ishinde aport negizinde shyǵarylǵan 29 jańa sort bar, — dep túıindedi Erbol Tasjúrekov.

Aıta ketelik Astanada jastar men fermerlerdi biriktirgen Alma festıvali ótken edi.