Elde qandaı dáriler arzandady
ASTANA. KAZINFORM – Shilde aıynda elimizdegi dárihanalarda baqylanatyn dárilik zattardyń tórtten birine jýyǵynyń baǵasy arzandady.
Qazaqstanda shilde aıynda 589 dárilik preparattyń bólshek saýdadaǵy baǵasy tómendedi. Monıtorıng eldiń 20 óńirindegi 2 555 dárilik zatty qamtydy.
— Baqylanǵan dárilik zattardyń shamamen jartysynyń — 1 267 preparattyń baǵasy ózgerissiz qaldy. Al 147 preparattyń baǵasy 20%-dan astam tómendese, taǵy 198 preparattyń baǵasy 10–20%-ǵa, 244 ataýdyń baǵasy 5–10%-ǵa arzandaǵan, — delingen habarlamada.
Baǵasy tómendegen dárilik zattardyń qatarynda ınfektsııalyq aýrýlardy, júrek-qan tamyrlary aýrýlaryn jáne asqazan-ishek joly aýrýlaryn emdeýde keńinen qoldanylatyn preparattar bar.
— Atap aıtqanda, Zıtmak 250 mg № 6 preparatynyń baǵasy 24,25%-ǵa, Tseftrıakson 1 g — 22,03%-ǵa, Pantap 20 mg № 14 — 20,1%-ǵa* tómendedi. Sonymen qatar, *Lızınoprıl-LF 20 mg № 10 — 14,7%-ǵa, Enap 5 mg № 10 — 13,27%-ǵa, Pýlmıkort 0,25 ml — 11,09%-ǵa, Amoksıklav 875 mg/125 mg — 6,86%-ǵa arzandady, — delingen DSM habarlamasynda.
Dárilik zattardyń naqty quny tańbalaý jáne qadaǵalaý júıesi arqyly baqylanady. Bul júıe dárilik preparattardyń medıtsınalyq uıymdar men dárihanalardaǵy qozǵalysy men qoljetimdiligin baqylaýǵa, sondaı-aq naqty baǵalardy memleket belgilegen shekti baǵalarmen salystyrýǵa múmkindik beredi.
Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń tóraǵasy Baýyrjan Júsipovtiń aıtýynsha, tsıfrlyq quraldar farmatsevtıkalyq naryqtaǵy ózgeristerdi jedel anyqtap, belgilengen shekti baǵalardyń asyp ketý jaǵdaılaryna ýaqtyly den qoıýǵa múmkindik beredi.
Tutynýshylar úshin qosymsha tekserý quraly retinde Naqty Onim mobıldik qosymshasy qoljetimdi. Onda preparattyń óndirýshisi men dıstrıbıýtory, satylatyn dárihana, sondaı-aq belgilengen shekti bólshek saýda baǵasy týraly aqparatty kórýge bolady.
Sonymen qatar Densaýlyq saqtaý mınıstrligi dárilik zattardyń baǵasyn memlekettik retteý tásilderin qaıta qarady. Endi negizgi basymdyq áleýmettik mańyzy bar jáne halyq arasynda suranysqa ıe preparattarǵa berilgen.
— Tizbeni ózektendirý nátıjesinde memlekettik baǵa retteýi 3 039 retsept arqyly bosatylatyn dárilik preparatqa qoldanylady. Al 4 918 preparat, onyń ishinde retseptsiz bosatylatyn dárilik zattar jáne quny 1 aılyq eseptik kórsetkishten (AEK) aspaıtyn retsept arqyly bosatylatyn preparattar memlekettik baǵa retteýinen shyǵaryldy, — delingen habarlamada.
Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń málimetinshe, bul memlekettik baqylaýdy halyq úshin eń mańyzdy dárilik zattarǵa shoǵyrlandyrýǵa jáne sonymen qatar farmatsevtıkalyq naryqqa túsetin ákimshilik júktemeni azaıtýǵa múmkindik beredi.
Shekti baǵalardyń saqtalýyna baqylaý jalǵasyp jatyr. 2026 jyldyń birinshi jartyjyldyǵynda belgilengen shekti baǵalardy asyrýdyń 6 faktisi anyqtalyp, olar boıynsha ákimshilik sharalar qoldanyldy. Salynǵan aıyppuldardyń jalpy somasy 1,4 mln teńge.
Dárilik zattardyń qoljetimdiligin qamtamasyz etý jónindegi jumys óndirýshilermen, dıstrıbıýtorlarmen jáne dárihana uıymdarymen birlesip jalǵasýda. Shilde aıynyń sońynda Densaýlyq saqtaý mınıstrligi farmatsevtıkalyq naryq qatysýshylarymen keńes ótkizip, onda dárilik zattardy jetkizýdiń turaqtylyǵy jáne baǵanyń negizsiz ósýine jol bermeý máseleleri talqylandy.
Aıta ketelik estý apparatyn alý úshin endi múgedektik mártebesi talap etilmeıdi.
