Elde qan aınalymy dertine qansha adam shaldyqqan
ASTANA. KAZINFORM — Qan aınalym júıesi aýrýlary bar 1,9 mln patsıent medıtsınalyq baqylaýda tur. Bul týraly búgin Quryltaıdyń jalpy otyrysynda Juldyz Danbaeva málim etti.
- Júrek-qantamyr aýrýlarynyń aldyn alý men emdeý – adam ómirin saqtaýdyń mańyzdy sharty. Bul másele halyqtyń ómir súrý uzaqtyǵy men sapasyna da tikeleı áser etedi. Sondyqtan damyǵan elder aýrýdy erte anyqtaýǵa, tıimdi emdeýge jáne medıtsınalyq kómektiń qoljetimdiligin arttyrýǵa basymdyq beredi. 2026 jyldyń basyndaǵy málimetke qaraǵanda, qan aınalym júıesi aýrýlary bar 1,9 mln patsıent medıtsınalyq baqylaýda turǵan. Bul eresek turǵyndardyń 14,4 paıyzyna teń. Onyń ishinde 114 myń jaǵdaı alǵash ret anyqtalǵan. Sonymen qatar patsıentterdiń 90 paıyzy ambýlatorııalyq deńgeıde em qabyldaıdy. Degenmen, alǵashqy medıtsınalyq-sanıtarlyq kómek júıesinde birqatar ózekti másele bar, - dedi Juldyz Danbaeva Densaýlyq saqtaý mınıstriniń atyna joldaǵan depýtattyq saýalynda.
Onyń aıtýynsha, kardıologııalyq qyzmetti damytýda kadr tapshylyǵy da ózekti másele bolyp otyr. Qajettilik 4 014 mamandy quraǵanymen, is júzinde elimizde 661 maman ǵana jumys isteıdi. Materıaldyq-tehnıkalyq bazany da jańartý qajet. Medıtsınalyq jabdyqtardyń tozýy shamamen 40 paıyzdy quraıdy. Al alǵashqy medıtsınalyq-sanıtarııalyq kómek uıymdarynda bastapqy kardıodıagnostıkaǵa qajetti jabdyqtar tolyq emes.
- Skrınıngtiń qamtý aýqymy da shekteýli. Qoldanystaǵy júıe 30 jastan asqan azamattar men jekelegen toptardy ǵana qamtıdy. Bul aýrýdyń qaýpin erte anyqtaýdy tómendetedi. Dári-dármekpen qamtamasyz etý de tolyq sheshilmegen. Ambýlatorııalyq dárilik qamtamasyz etý qajettiliktiń 40-50 paıyzyn ǵana óteıdi. Jetkizýdegi irkilister saldarynan preparattar jylyna 8-10 aı ǵana qoljetimdi bolyp, emniń úzdiksizdigine nuqsan keledi. Al júrek-qantamyr aýrýlaryn tıimdi baqylaý úshin dárini turaqty qabyldaý asa mańyzdy, - dedi depýtat.
Osyǵan baılanysty «Ádilet» partııasy fraktsııasy mınıstrlikke mynadaı usynystardy engizdi:
- Іri alǵashqy medıtsınalyq-sanıtarııalyq kómek uıymdary bazasynda ár 150 myń turǵynǵa bir ınvazıvti emes dıagnostıka ortalyǵyn qurýdy jáne terapevter men jalpy praktıka dárigerlerin qaıta daıarlaýdy;
- 18 jastan bastap halyqty skrınıngten ótkizýge arnalǵan jasandy ıntellekt baǵdarlamalaryn jáne patsıentterdiń jaǵdaıyn qashyqtan monıtorıngteý júıesin engizýdi;
- Kardıologııalyq qyzmetti jańǵyrtý, kadrlyq áleýetti arttyrý jáne medıtsınalyq kómektiń qoljetimdiligin jaqsartý maqsatynda keshendi transformatsııa baǵdarlamasyn ázirleýdi usyndy.
Aıta kaeteıik, júrek-qan tamyrlary aýrýlaryn, qant dıabetin jáne glaýkomany anyqtaýǵa arnalǵan skrınıngten 40–76 jas aralyǵyndaǵy erler men áıelder eki jylda bir ret ótedi.
