Kadr tapshy óńirlerge kóship barǵandarǵa baspana alýǵa 7 mln teńgege deıin beriledi
ASTANA. KAZINFORM — Qazaqstanda kadr tapshylyǵy bar óńirlerge erikti túrde qonys aýdarý baǵdarlamasy jańartylyp, oǵan qatysýshylarǵa kórsetiletin memlekettik qoldaý kúsheıtildi.
Eńbek jáne halyqty áleýmettik qorǵaý mınıstrliginiń málimetinshe, endi ekonomıkalyq utqyrlyq sertıfıkatynyń eń joǵary mólsheri 7 mln teńgege deıin (1 625 AEK) ulǵaıtyldy. Bul qarajatty jańa óńirden turǵyn úı satyp alýǵa paıdalanýǵa bolady.
— Baǵdarlama aıasynda qonys aýdarýshylarǵa kóshý shyǵyndaryna sýbsıdııa beriledi, turǵyn úıdi jaldaý men kommýnaldyq qyzmet aqysy óteledi. Sondaı-aq jumysqa ornalasýǵa qoldaý kórsetilip, jańa óńirge kóshpeı turyp-aq bos jumys oryndaryn tańdaý múmkindigi qarastyrylǵan, — delingen habarlamada.
Bıyldan bastap baǵdarlamaǵa tek jumyssyz azamattar ǵana emes, eńbek naryǵynda suranysqa ıe mamandar men sharýa jáne fermer qojalyqtarynyń basshylary da qatysa alady.
Baǵdarlama tolyq tsıfrlyq formatqa kóshirildi. Ótinish berý sharttarymen, suranysqa ıe mamandyqtarmen jáne bos jumys oryndarymen migration.enbek.kz portalynda tanysýǵa bolady.
Mınıstrliktiń dereginshe, 2017 jyldan beri baǵdarlamaǵa 73,9 myń adam qatysyp, olardyń 31 myńy turaqty jumyspen qamtylǵan.
Eske salaıyq, buǵan deıin «7-20-25» baǵdarlamasyn iske asyrý aıasynda 2026 jylǵy 25 maýsymdaǵy jaǵdaı boıynsha 1,223 trln teńgege 85 577 qaryz berilgenin jazǵanbyz.
