Elde ınvestorlarmen sotqa deıingi daýdy retteý jónindegi komıssııa qurylady
ASTANA. KAZINFORM — Qazaqstanda ınvestorlar men memlekettik organdar, jergilikti atqarýshy organdar, memlekettik mekemeler jáne kvazımemlekettik sektor sýbektileri arasyndaǵy daý-shardy sotqa deıin retteý jónindegi komıssııany qurý qaǵıdasy bekitildi.
Tıisti buıryqqa QR Bas prokýrory 2026 jylǵy 20 shildede qol qoıdy. Qujat 2026 jylǵy 16 tamyzdan bastap qoldanysqa engiziledi.
Qujatqa sáıkes, ınvestıtsııalyq qyzmetke baılanysty daýdy sotqa deıin retteý týraly ınvestordyń, memlekettik organnyń, ákimdiktiń, memlekettik mekemeniń, kvazımemlekettik sektor sýbektisiniń nemese ınvestıtsııalyq prokýrordyń ótinishi komıtetke túskennen keıin komıssııa qurylady. Komıssııany qurý týraly sheshimdi komıtet tóraǵasy nemese onyń mindetin atqarýshy jeti jumys kúni ishinde qabyldaıdy.
Sonymen qatar, eger ótinish Konstıtýtsııalyq zańda belgilengen merzimnen kesh berilse, komıtet ony qaraýdan bas tartýǵa quqyly.
Komıssııanyń bes múshesi bolady. Onyń quramyna komıtettiń qurylymdyq bólimsheleriniń basshylary, QR Syrtqy ister mınıstrligi Investıtsııalar komıtetiniń ókili, sondaı-aq «Atameken» Ulttyq kásipkerler palatasy basqarmasynyń múshesi enedi. Komıssııanyń quramy, tóraǵasy jáne hatshysy jeke buıryqpen bekitiledi.
Usynylǵan materıaldardy jan-jaqty qarastyrý úshin, qajet bolǵan jaǵdaıda komıssııa otyrysyna múddeli memlekettik organdardyń ókilderi men tıisti sala sarapshylary tartylýy múmkin.
Komıssııanyń jumys organy qurylǵan kúnnen bastap úsh jumys kúni ishinde materıaldardy daıyndap, otyrystyń kún tártibiniń jobasyn jasap, ony uıymdastyrýdy qamtamasyz etýi kerek.
Otyrys qorytyndysy boıynsha hattama rásimdeledi. Sonyń negizinde Komıtet qorytyndy shyǵarady.
Jańa qaǵıda 2026 jylǵy 16 tamyzdan bastap kúshine enedi.
Aıta keteıik, buǵan deıin prokýratýra 5,8 mlrd teńgelik ınvestjobany zańsyz tekserýden arashalap qalǵanyn jazǵanbyz.
